Körüşüv çerçivesinde azırlav kurslarınıñ diñleyicileri Temsilcilikniñ reberiyetinen olarnı raatsızlağan meselelerni muzakere etti, teessuratlarınen ve oquvnen bağlı planlarınen paylaştılar.
Daimiy Temsilcisi, gençlernen çalışuv ğayrıdan integratsiya etüv siyasetiniñ müim bir parçası olğanını qayd etti ve vaqtınca işğal etilgen Qırımdan kelgen vatandaşlarımız aqlarını yerine ketirgende yüz bergen qıyın meselelerniñ çezilmesi içün qolundan kelgenini yapacağını vade etti.
Vaqtınca işğal etilgen Qırımda yaşağan balalarnen çalışuv devlet siyasetiniñ müim yönelişlerinden biridir, çünki Qırım Muhtar Cumhuriyeti ve Aqyar şeeri vaqtınca işğal etilgen alda bulunğan arada işğalci devlet Rusiye Federatsiyası halqara uquq qaidelerini boza, balalarnı ana tillerinde tasil almaq aqqından marum ete, arbiy-vatanperverlik terbiyelev tedbirlerini alıp bara ve tasil ceryanını arbiyleştire.
Hatırlatamız ki, bu yıl 23 Ukraina aliy oquv yurtı vaqtınca işğal etilgen topraqlarda yaşağan balalar içün ilk yaz ayınıñ 29-dan arman ayınıñ 31-nece stipendiyalı eki aylıq azırlav kurslarını keçirmekte. Aliy oquv yurtlarına kirişke ve oquvğa azırlağan kurslarda oquğan talebeler ukrain tili ve edebiyatı, Ukraina tarihı, riyaziyat ve ingliz tili kibi esas fenler boyunca 225 saat miqdarında lektsiyalar diñlemekte, 4588,00 grivnâ miqdarında stipendiya almaqta ve yataqhanede bedava yernen temin etilmektedir.