Bugün, iyünniñ 22-nde, siyasiy mabüs Rustem Şeyhaliyev 46 yaşını toldura.

Endi altı yıldan berli jurnalist ve cemaat faali doğğan kününi apiste qayd ete.

Rustem 1979 senesi Özbekistannıñ Samarqand şeerinde dünyağa keldi. Onıñ qorantası 1944 senesi diger qırımtatarlarnen beraber şarqqa sürgün etildi. O, bütün balalığını anda keçirdi, 8-ncı sınıfqa qadar anda oqudı, soñra 14 yaşında Qırımğa köçip keldi ve mektepni endi Vatanında bitirdi. Bundan soñ Rustem 26-ncı Aliy zenaat-tehnikiy oquv yurtuna oqumağa kirdi ve “Elektrogaz qaynaqçısı” zenaatını qazandı.

Şeyhaliyevlerniñ 3 balası bar: qızı Zülfiye ve oğulları Renat ve Celâl. Rustem ailesi içün ev qurmağa arzu ete edi – bu, onıñ bütün boş vaqtını sarf etken bir merağı oldı. Rustemniñ apiske alınması bütün qorantasınıñ ayatını deñiştirdi: Rustemniñ apayı Suriye üç balasınıñ yekâne vasiyi oldı. Böyle vaziyet qırımtatarlar arasında siyrek degil – qoranta azalarından birini azatlıqtan marum etüv, qorantağa baqqan biriniñ olmaması demektir ve bu, eñ evelâ balalarğa maneviy travma ola.

Qırım işğal etilgen soñ Rustem çette turıp olamadı ve faal sürette işğalciler tarafından siyasiy mabüslerge qarşı yapılğan qanunsız mahkeme oturışuvlarına qatnamağa başladı, qırımtatarlarnıñ repressiyaları mevzusını aydınlattı, zarar körgenlerniñ qorantalarına yardım etti. 2015 senesinden başlap jurnalist oldı – Rustemniñ esas faaliyeti Qırımda ruslar tarafından yapılğan cinayetlerni qayd etüv oldı. Rustem adaletni tiklemek, siyasiy mabüslerge destek ve yardım etmek içün elinden kelgenini yapa edi.

2019 senesi martnıñ 27-nde Rusiye mahsus hızmetleri Şeyhaliyevniñ evine kirip, tintüv keçirip, faalni tutıp aldılar. Rustemni “Hizb ut-Tahrir” teşkilâtında iştirak etüvde qabaatlaylar, oña 20 yıl apis cezası berile bile.

Şimdi faal krasnoyarsk vilâyetiniñ yeniseysk şeerinde 2-nci apishanede buluna. Rustemniñ alı ket-kete fenalaşa – faal, köksünde ağrılar, zayıflıq, varikoz ve burun qanamalarından şikâyet ete. Siyasiy mabüsniñ aytqanına köre, rus ekimleri oña kerekli yardım köstermey ve baquv keçirmeyler.

Siyasiy mabüsniñ qanunsız apiste tutulması rusiye tarafından qırımtatar halqına qarşı yıllar devamında yapılğan repressiyalar, qorqutuv ve basqı siyasetiniñ bir qısmıdır. Halqara toplulıqnı çette qalmamağa ve bütün siyasiy mabüslerniñ deral azat etilmesini, vaqtınca işğal etilgen Qırımda repressiyalarnıñ toqtatılmasını ve halqara gumanitar uquq normalarına riayet etilmesi içün rusiye federatsiyasına basqını arttırmağa çağıramız.