Sarı ve mavı renkler Galitsko-Volinskiy knâzlığınıñ ve kazak ordusınıñ timsallerinde qullanıla edi, mavı-sarı bayraq ise 1917-1921 seneleri Ukrain inqilâbı vaqtında milliy timsal oldı. 1917 senesi de, mavı-sarı bayraq milliy Merkeziy Rada tarafından tasdıqlanğan edi. Aynı şu devirde, 1918 senesi aprelniñ 29-nda Qırım üzerinde de ukrain bayrağı dalğalandı. O vaqıt Qara deñiz flotunıñ bütün gemilerinde ukrain mavı-sarı bayraqları köterilgen edi. Rusiyeniñ sabıq Qara deñiz flotı, bir qaç asırlıq yoqluğından soñ ğayrıdan tiklengen Ukraina Halq Cumhuriyetine ve Kıyivge ant etti. Rusiye propagandası bu müim tarihiy faktnı daima körmemezlikke urmağa tırışa.
On yıllar devamında bayrağımız tarihnıñ qıyın ve qaramaniy saifelerine şaat oldı. Mustaqillik içün küreşte onı köterdiler, yasaq ve taqiplerden qorçaladılar, esaretniñ eñ qaranlıq vaqıtlarında saqladılar. Bugün o, rusiye federatsiyasınıñ istilâsına qarşı turğan millionlarnen ukrainlerniñ cesürliginiñ timsali oldı.
Bu kün Qırım içün ayrı bir mana taşımaqta. İşte, Ukraina devlet bayrağı, qırımtatar milliy bayrağınen beraber, 2014 senesi fevral 26-nda mitingte dalğalandı. Ve şimdi de, vaqtınca işğalge baqmadan, mavı-sarı bayraq Qırımdaki vatandaşlarımıznıñ yüreklerinde yaşamağa devam ete. O, qarşılıq kösterüv ve serbestlikke ümüt timsali oldı. Baydar Yaylası, Pahqal Qaya, Anğara Burun, İlyas Qaya kibi dağlarda ve yarımadanıñ bir çoq diger şeerlerinde faaller ukrain bayrağını köterip, ukrainlerniñ birligini ve yeñilmezligini köstereler. Ukraina bayrağı işğalciler içün qozğayıcıdır. Milliy timsal Qırım sakinlerini ‘yasaq etilgen timsallerni kösterüvde’ ve ‘rusiye ordusınıñ itibarını tüşürüvde’ qabaatlap, taqiplerge oğratuv aleti oldı. Amma er şeyge baqmadan, Qırımdaki cesür vatandaşlarımız azatlıqtan marum etilüv, taqip ve apis cezası telükesine baqmadan, onı kötermege devam eteler. Olarnıñ areketleri Ukraina Qırımınıñ bar olğanına ve onıñ qaytarılması içün küreş devam etkenine isbattır.
Bizim bayrağımız da halqara birdemlik timsalidir. Bugün o tek Ukrainada degil de, dünyanıñ bir çoq memleketlerinde dalğalana. Bu Qırımnen beraber devlerimizniñ topraq bütünlikni tiklemek içün küreşte Ukrainağa yardım etmek ve halqara uquq printsiplerini qorçalamaq içün işarettir.
Mavı-sarı bayraq mıtlaqa azat Qırım topraqlarında kene dalğalanacağından eminmiz. Bu azatlıqnıñ zulum üzerinde ğalebesi, adaletniñ tiklenüvi ve yarımadağa tınçlıq ve şeref qaytarılmasınıñ timsali olacaqtır. Ukraina milliy bayrağı künü – birlikniñ quvetini ve halqımıznıñ yeñilmezligini añdıruvdır. O, keçmişni, şimdiki zamannı ve kelecekni birleştire, em de bu bayraq astında küçlü ve işğalcilerden azat Ukrainanı quracağımızğa işançlarımıznı tasdıqlay.