Bayraq – bir halqqa ait olğan medeniy kodnıñ esas elementlerinden biridir. Bu, küreş ve ğalebeler, qazanılğan ve ğayıp etilgenlerniñ timsalidir.

İyünniñ 26-nda bizler Qırımtatar Milliy Bayraq kününi qayd etemiz. Qırımtatar bayrağı – kök yüzüniñ alâmeti olğan mavı renk ve Giraylar sülâlesiniñ tuğrası taraq tamğanı temsil ete. Tamğa Qırım hanlığınıñ paralarında ve müürlerinde bastırıla edi, 20-ncı asırdan başlap ise qırımtatar halqınıñ timsali olaraq qullanıla.

1783 senesi Qırım Hanlığı, 2014 senesi Qırım Muhtar Cumhuriyeti kibi ruslar tarafından işğal etildi. Qırımtatarlarnıñ ğayrıdan tiklenüvi başlanğanınen de Qırım Hanlığınıñ timsalleri kene qullanılmağa başladı.

1917 senesi qırımtatar bayrağı Birinci Qırımtatar Qurultayı tarafından resmiy bayraq olaraq qabul etildi. Bayraqnıñ ikâyesi halqnıñ ikâyesini aks ete edi: mavı bayraq 1929 senesi kommunistler tarafından yasaq etildi, 1944 senesi ise onıñ saqlanuvı cinayet olaraq sayıla edi.

Sovet Birliginiñ dağılmasınen ve qırımtatarlarnıñ Qırımğa qaytuvınen milliy bayraq ğayrıdan tiklene ve 1991 senesi Aqmescitte keçken ekinci Qurultayda daa bir kere qabul etile.

Bugün altın tamğalı mavı bayraq – tuvğan topraqra yaşama aqqı ve Ukraina tamır halqınıñ aq ve uquqları içün küreş timsali. Bu bayraq cebede, okoplarda ve Ukraina devletiniñ qorçalayıcıları yanında, bugün o, binalarnıñ üstünde dalğalana ve bizler içün qırımtatar halqınıñ quvetini ve cesürligini, işğalcilerge ve olarnıñ tecavuziy planlarına qarşılıq kösterüvni temsil ete.

Bugünge qadar ruslar, Qırımda sarı-mavı bayraqlarnı yoq etmek içün, qırımtatarlar, Ukraina ve yarımadanıñ kerçek tarihı aqqında hatıralarnı sildrimek içün elinden kelgenini yaptı.

Ümüt etemiz ki, eñ yaqın zamanda qırımtatar bayrağı Ukraina devlet bayrağınen serbest Qırımnıñ şeerlerinde kene beraber dalğalanacaq!