Bugün Ukrayina Qırım Muhtar Cumhuriyeti ve Aqyar şeeriniñ işğaline qarşılıq Kününi qayd ete. 2014 senesi Qırım işğali neticesinde Rusiyeniñ Ukrayinağa qarşı silâlı istilâsı başlandı. Bu kün yarımada sakinleriniñ cesürligi, birligi ve cesaretiniñ timsali oldı.

2014 senesi fevral 26-nda Qırım Muhtar Cumhuriyeti Yuqarı Şurasınıñ binası yanında Ukrayina topraq bütünliginiñ saqlanuvı içün ve 2014 senesi fevral 25-de Qırım parlamentiniñ nevbetten tış sessiyasınıñ teşkil etilmesine qarşı çıqqan biñlernen insan toplandı. Rusiye, “Qırım mustaqilligi içün referendum” keçirilmesi meselesini sessiyağa yüklemege tırışa edi, amma biñlernen vatandaşnıñ narazılığı neticesinde parlamentniñ nevbetten tış toplaşuvına yol berilmedi.

Ertesi künü RF, yarımada zapt etüvniñ açıq küç fazasına keçti. Tanım işaretleri olmağan silâlı askerler memuriy binalarnı zapt ettiler, ukrayin arbiy bölüklerini ve strategik obyektlerni blok etmege başladılar. Böylece, endi 12 yıl devam etken vaqtınca Qırım işğali başlandı.

Bu vaqıt içinde Qırım insan aqlarınıñ sistematik bozuluvı, siyasiy taqipler, qırımtatarlar ve Ukrayinağa qoltutqan faallerniñ taqip etilüvi, askerleştirüv ve ruslaştıruv bölgesi oldı. Buña baqmadan, qarşılıq çeşit şekillerde devam etmekte.

Fevral 26 künü Qırım Ukrayinanıñ bir qısmı olıp qalacağı aqqında hatırlatma oldı. İşğalden azat etilmesi içün küreş devam ete, yarımadanıñ qaytarılması ise adalet, havfsızlıq ve halqara uquqnıñ tiklenmesi meselesidir.