Bugün Kıyivdeki Sofiya meydanında Ukrayina Mustaqilliginiñ 34-nci yıllığı munasebetinen tantanalı tedbirler keçirildi. Tedbirde Kanada baş naziri Mark Carney, prezident Trampnıñ mahsus temsilcisi general Kit Kellogg, İsveçiya, Danimarka, Romaniya, Litva, Latviya mudafaa nazirleri, Büyük Britaniya işlerinden nazir iştirak etti.

Ukrayina prezidenti Volodımır Zelenskıy öz çıqışında şunı qayd etti: ukrainler öz milliy aqqını bir qaç kere isbatladılar ve Ukrayinanıñ topraq bütünligi içün küreşmege devam etecekler. Ukrayin halqı Avropanıñ eñ qıyın yollarından keçti, lâkin öz memleketini saqlap oldı.

Mark Carney, Kanada daima Ukraina ile yan-yanaşa turğanını qayd etti. Kanada baş naziri, şimdi bu küreşniñ müim devrinden keçkenimizni, şunıñ içün halqara toplulıqnıñ destegi quvetleşmesi kerekligini qayd etti. Öz çıqışınıñ soñunda Mark Carney Kanadanıñ, dünya toplulığı tarafından rusiyege qarşı sert sanktsiyalar kirsetilmesini ve rusiyeniñ Ukrainağa qarşı tecavuzı ve insan aqları bozuluvları içün mesüliyetke çekilmesini talap etkenini ifade etti.

Daa 1991 senesi Kanada Ukrayinanıñ mustaqiligini ve suverenitetini tanığan birinci ğarbiy memleket oldı. 2014 senesi ise rusiye Qırımğa sürip kirgen vaqıtta Kanada UNIFIER operatsiyasını başladı ve Ukrayina Silâlı Quvetlerini ögretmek içün yüzlernen asker yolladı. O vaqıttan berli bu operatsiya çerçivesinde 45 biñden ziyade ukrayin askeri azırlıq kördi.

Çıqışlardan soñ Ukrayina devlet mukâfatları, Cesürlik ve cesaret nişanları ve şerefli unvanlarnıñ resmiy taqdim etilmesi başlandı. Digerleri arasında qırımtatar asıllı ukrain yırcısı Jamala III derece Printsessa Olga nişanına taqdim olundı.