5 mayıs künü qırımtatar uquq qorçalayıcı Server Mustafayev doğğan kününi qayd ete.

Server Mustafayev 1986 senesi samar avilâyetinde doğdı, lâkin ayatınıñ büyük qısmını Qırımnıñ Bağçasaray şeerinde keçirdi. İssilik gazı teminlevi ve avalandırma saasında tasil aldı, satış ve kirişimcilik saasında çalıştı, furunhane ağını qurdı. Aynı zamanda cemaat yaşayışında faal iştirak ete: tedbirler teşkil ete, içtimaiy teşebbüslerge qoltuta ve az kelirli qorantalarğa yardım ete edi.

2014 senesi Qırım işğali başlağan soñ uquq qorçalayıcı qanunsız mahküm etilgenlerniñ qorantalarına yardım etmege başladı, o, Qırım birdemligi teşebbüsiniñ koordinatorlarından biri edi.

2018 senesi mayısnıñ 21-nde Rusiye quvetçileri Bağçasaraydaki evinde tintüv keçirdi, soñra onı tutıp aldılar. Serverni “terror teşkilâtınıñ faaliyetinde iştirak etüv” maddesi, hususan “Hizb ut-Tahrir” davası boyunca qabaatladılar. 2020 senesi rusiye mahkemesi onı 14 yılğa qadar apis cezasına mahküm etti.

Server Mustafayev endi altı yıldan ziyade rusiye apishanesinde buluna. Basqılarğa baqmadan, o, Qırımda vatandaşlıq tirenüviniñ timsallerinden biri olıp qala.

Bugün o öz doğğan kününi kene apishanede qayd ete. Onıñ ikâyesi – mesüliyetlilik, birdemlik ve eñ zor şaraitlerde bile başqalarnı qorçalamağa azırlıq aqqındadır.