2018 senesi boş ay (noyabr) 13 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ baş mesleatçısı Yevgen Samuha Kıyiv şeerinde bir sıra körüşüvlerni keçirdiler.
Vaqtınca işğal etilgen Qırımnıñ civarındaki rayonlarda istilâcı devletniñ qanunsız tesirine qarşılıq kösterüv boyunca İş gruppasınıñ qararlarını yerine ketirerek, Devlet sıñır hızmeti Memuriyetiniñ, infraterkip Nazirliginiñ, Ukraina devlet maliye Fondunıñ ve ‘‘Ukraina deñiz limanları Memuriyeti’’ Devlet müessisesiniñ vekâletli hadimleri ile nevbetteki muşavere keçirildi. Tedbir esnasında yuqarıda añılğan idareler öz-ara añlaşıp, Azaq-Qaradeñiz yalısında, hususan Mariupol, Berdânsk, Geniçesk, Skadovsk, Oçakiv ve Odesa seerinde Ukraina devlet sıñır hızmeti Deñiz bekçiligi bölükleriniñ yerleştirilüvi ile bağlı olıp, acele sürette çezilecek meseleler boyunca işbirlik aqqında keliştiler. Bu cümleden, Ukraina Devlet sıñır Hızmetiniñ yañı idaresini teşkil etüv şaraitlerinde mülkiyetni teslim etüv, kiralavnen bağlı munasebetler, añlaşmalarnı imzalav kibi meseleler muzakere etildi. Borıs Babin, RF ile silâlı dava ve vaqtınca Qırım işğali şaraitlerinde Qara ve Azaq deñizlerindeki Ukraina devlet menfaatlarını semereli şekilde qorçalavına yüksek qıymet keserek, Deñiz bekçiligi quvetleriniñ imkânlarını kenişletmek maqsadınen ukrain sıñır bekçilerine devlet bücetinden mütenasip maliye ayırıluvında Temsilcilik ertaraflama yardım ve qol tutuv bereceginde muşavere iştirakçilerini işandırdı.
Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele tedbirler Planını yerine ketirerek, Ukraina infraterkip Nazirliginiñ, Ukraina havfsızlıq hızmetiniñ ve ‘‘Ukrpoşta’’ halq ögündeki aktsioner cemiyetiniñ vekâletli temsilcileri ile muşavere keçirildi. Muşavere esnasında işğal etilgen yarımada ile poçta vastasınen alâqanı imkânsızlaştıruv, sözde ‘‘Qırım poçtası’’-nıñ faaliyetini taqip etüv ve RF toprağından vaqtınca işğal etilgen Qırım muhtariyetine gizli şekilde yollanmalarnı teslim etken şahsiy ukrain şirketlerini ve taşıyıcılarnı cezalav oğrunda qanuniyet çerçivesinde yapıla bilecek adımlar belgilendi. Beraberlikte belgilegen vazifelerni yerine ketirmek maqsadınen muşavere iştirakçileri muayyen algoritmlerni qabul ettiler. Daimiy Temsilci Ukraina infraterkip Nazirliginiñ ve ‘‘Ukrpoşta’’ halq ögündeki aktsioner cemiyetiniñ vekillerine vaqtınca işğal etilgen yarımadada bulunğan mülkiyetleriniñ qorçalanması içün halqara mahkemelerge muracaat etmege ve Umumcian poçta birligi ve ortaqlarımız olğan devletlerniñ milliy poçta idareleri ile istilâcı devletke qarşı sanktsion tedbirlerni qabul etüv boyunca işbirlikte bulunmağa tavsiye etti.