2018 senesi arman ayı (avgust) 28 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikte halqara alâqalar hızmetiniñ baş mesleatçısı Taisiya Tkaçenko Ukrainada AHIT Mahsus nezaret etici taqımı Herson gruppasınıñ nezaretçileri Piter Çilvers ve İrena Ballesteros ile körüşüvleri esnasında ‘‘Mehanik Pogodin’’ rusiye tankeriniñ yaqalanuvı etrafındaki informatsıon rezonansnı, bu cümleden, işbu tanker bulunğan Herson limanına AHIT MNT közeticilerniñ ziyaretini muzakere ettiler. Daimiy Temsilci közeticilernen Taqımnıñ vekâletleri çercivesindeki vazifelerni becermek niyetinen limanğa işbu ziyaretniñ rusiye propagandası tarafından informatsıon cenkni kene de qozğalamaq, Ukrainanıñ içki suvlarında RF bayrağı altında bulunğan geminiñ vaziyeti aqqında haber vastalarına yanlış malümat bermek maqsadınen işletilüvini muzakere etti.

Bu mesele bağlamında Borıs Babin bu vaziyette ‘‘Mehanik Pogodin’’ tankeri öz isteginen Ukrainanıñ içki suvlarına kelip bulunğanını, işbu tanker RF-nıñ arbiy gemisi ya da mahsus devlet gemisi olmağanını qayd etti. Onıñ içün Herson ticariy deñiz limanında bulunğan ticariy geminiñ nasıldır ‘‘RF territoriyası’’ olaraq adlandırılması rusiye propagandasınıñ ve istilâcı devletniñ mahsus hızmetleriniñ yalanlarından başqa bir şey degildir.

Muzakere esnasında Borıs Babin halqara deñiz saasındaki ve gumanitar uquqnıñ  bu tankerniñ tosmenge aluvını aqlağan esas şartlarını, milliy qanuniyetniñ maddelerini aydınlattı ve rusiye isilâsınen bağlı olıp, istilâcı devletniñ Ukraina topraqlarındaki qanunsız faaliyetiniñ neticesi olaraq Ukraina akimiyet organları tarafından yapılğan işbu areketleriniñ siyasiy, uquqiy ve teşkiliy temellerine diqqatnı celp etti. Bundan ğayrı, gemini tosmenge aluvnıñ ameliy şartları ve müddetleri ve gemide bulunğan taqımnıñ aqları ile yükniñ vaziyeti muzakere etildi.

Qara deñizde balıq avı ile oğraşqan ‘‘ЯМК-0041’’ ukrain balıqçı gemisini yaqalağan RF işğalci devleti halqara uquqnıñ şartlarını bozğanı kene de tekrarlandı ve bu geminiñ taqım azalarınıñ rusiye cezalav organları tarafından Qırımda reineler olaraq tutulğanınıñ siyasiy sebepleri muzakere etildi. Yaqalanğan  ukrain ‘‘Nord’’ gemisinde çalışğan Ukraina vatandaşlarınıñ RF elcihanesinde bulunmaları da hatırlandı. İstilâcı devlet meramını gizlemeyip, öz siyasiy talaplarnı yerine ketirmek maqsadınen, halqara uquqnıñ esas temellerine baqmadan, bu adamlarnı reineler olaraq tutqanı ve devlet seviyede siyasiy terrorizm ile oğraşqanı qayd etildi.