2014 senesi oraq ayı 17 künü işğalciniñ ordusı BUK raketa kompleksı vastasınen Ukraina üzerinden uçıp keteyatqan grajdan uçaqnı urıp tüşürdi. Bu uçaq Amsterdamdan Kuala Lumpurğa MH17 seferini yapa edi. Uçaqta 298 kişi ve bu cümleden 80 bala bar edi. Olarnıñ episi Kreml başlağan cenk neticesinde elâk oldılar.

2018 senesi ilk yaz ayı 20 künü mahsus taqiqat gruppası öz taqiqatını bitirdi, neticede 4 kişi qabaatlandı, olardan üçü – RF vatandaşları – İgor Girkin, onıñ muavini Sergiy Dubinskiy, ”DNR” istihbarat bölüginiñ reisi Leonid Harçenko ve sabıq Rusiye polkovnigi Oleg Pulatov. Bu sene saban (mart) ayında Felemenk devletinde mahkeme ceryanı başlandı. Dava ğıyabiy sürette baqılacaq, cünki Rusiye devleti taqiqat neticelerini tanımay.

“Dünyanıñ çeşit memleketlerinde bu facianıñ yıldönümi munasebeti ile Rusiyeniñ halqara cinayetlerini cemiyetke hatırlatmaq maqsadınen tedbirler keçirile. Bütün qurbanlarnı hatırlaymız, olarnıñ yaqınlarına taziyemizni bildiremiz. Bütün dünya adaletniñ tiklenmesini talap ete. Aqiqat yeñmeli. Yamanlıq ise belii etilip cezalanmalıdır. Devletimizniñ vazifesi ise, adalet vaqıtını yaqınlaştırmaqtır,” – dep izaatlay Ukraina Prezidentiniñ Qırım MC-deki Daimiy Temsilcisi Anton Korınevıç.

Skipgol ava limanı yanındaki Felemenk şeerçiginde MH17 qurbanlarına bağışlanıp tiklengen abideniñ etrafındaki 298 terek ve künaylan tarlası er bir qurbannı ve tınçlığı cenk ile bozulğan Ukraina çölüni temsil ete. Snejnıy şeeri yanındaki tarlanıñ künaylan çiçekleri arasında faciadan soñ ”Boing” uçağınıñ parçaları qıdırıldı.