“Age of Crimea – Qırım deviri” forumı çerçivesinde keçirilgen ”Qırımnıñ kelecegi aqqında dialog nasıl olmalı: yarımadanı işğalden azat etüv sekiliniñ muzakere etilüvi içün meydançıq” panel munaqaşasında çıqışta bulunğan Anton Korınevıç, Ukraina onıñ topraq bütünligine ve egemenligine qol tutqan halqara cemiyetke minnetdar olğanını qayd etti. BMT Baş Assambleyası 2014 senesi saban ayında Ukrainanıñ topraq bütünligine qol tutıp, qabul etken qararı ile bütün dünya içün tanımamazlıq siyasetine temel qoydı, ”Qırım Ukrainadır” şekilinde isbatlanmasını talap etmegen bir qaide meydanğa ketirdi.

Ukraina Prezidentiniñ Qırım MC-deki Daimiy Temsilcisi halqara cemiyet Qırımdaki işğalci akimiyet organlarınıñ qararlarını tanımağanını ve vaqtınca işğal etilgen topraqlarda bir-de-bir resmiy salâhiyetini tanımağanını qayd etti. Elbette, bu tanımamazlıq halqara cemiyet, cetel devletler tarafından Qırımnıñ işğal etilüvinde iştirak etken ve yarımadada insan aqlarını bozğan adliy ve cısmaniy şahıslarğa nibeten qabul etilgen sanktsiyalar vastasınen pekitile.

”Vaqtınca işğal etilgen Qırımda vaziyetni nezaret etken, insan aqlarınıñ bozuluvını ve arbiy cinayetlerni qalemge alıp, qayd etken cemaat teşkilâtlarına qol tutamız. Bundan ğayrı, siyasiy mabuslarnıñ qorantalarına ve aqları bozulğan isanlarğa qol tutuv meselesinen oğraşamız”, – dep qoştı Daimiy Temsilci.

Anton Korınevıç, Qırımnıñ vaqtınca işğal etilüvi tek Ukrainanı raatsızlağan bir mesele olmağanında emindir. Bu cenk, Avropada işğal meselesi, onıñ içün vaqtınca Qırım işğaline dair bütün meselelerniñ ve çağıruvlarnıñ halqara ortaqlarımıznen muzakere etilmesi pek müimdir.

”Qırımda Ukraina Ortodoks kilisesiniñ Qırım yeparhiyası ve öz kilisesini ve dindaşlarını qorçalamağa tırışqan Yepiskop Kliment sıfatında ukrain narazlıq ruhu halqara seviyede qol tutuvğa muhtaç”, – dep qayd etti Anton Oleksandrovıç.

Arbiy dava çağıruvlarına qarşılıq köstermelimiz, bu maqsat ile Ukraina Prezidenti 2019 senesi arman ayında aynı vaqıtta keçici devirde adliyeniñ milliy qavrayışı üzerinde çalışqan uquqiy islâat meseleleri boyunca Komissiyanı teşkil etti. Anton Korınevıçnıñ qayd etkenine köre, faaliyet devam etmekte, iş gruppasınıñ azaları bu leyhanıñ amelge keçirilmesinde ve yekünlenmesinde yardım etecek ve qol tutacaq halqara ortaqlarğa pek minnetdar olurlar.

Bundan ğayrı, Qırım meselelerini muzakere etmek maqsadınen muayen platformanı, meydançıqnı teşkil etmek kerek, bunıñ içün ise idarelerarası dialogqa ihtiyaç bar.

Öz çıqışına yekün çekerek, Anton Korınevıç Qırımda yaşağan ve Ukraina tamır halqınıñ vekilleri olaraq insan aqları ciddiy şekilde bozulğan qırımtatarlar da küreşlerinde halqara ortaqlarnıñ qol tutuvına muhtaç olğanını bildirdi.