2018 senesi boş ay (noyabr) 19 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikniñ Kıyiv şeerindeki ofisiniñ hadimleri Aqrusiye Cumhuriyetiniñ esas basma ve İnternet matbuat vastalarında çalışqan jurnalistler eyeti ile körüşip, olarnı Temsilcilikniñ kündelik faaliyeti, esas yönelişleri ve neticeleri ile tanıştırdılar.

Daimiy Temsilci vaqtınca işğal etilgen Qırımda kündelik arbiy, iqtisadiy, havfsızlıq, içtimaiy ve ekologik vaziyetni tarif etti, yarımadanı arbiyleştirüv ve bunınen bağlı energetik, naqliy infraterkip ve suv ile teminlev saalarında işğalci akimiyetniñ faaliyetini aydınlattı. Borıs Babin istilâcı akimiyet Qırımda sahte ‘‘milliy-medeniy muhtariyetlerni’’ teşkil etip, olar vastasınen soydaş devletlerge ve halqara cemiyetke basqı yapmağa ve istilâcı devletniñ Qırımnı ilhaq etmek ıntıluvını qabul ettirmege istegenini bildirdi.

Daimiy Temsilci işğalci Rusiye akimiyeti muntazam şekilde Azaq deñizinde ticariy deñizcilik saasında uquqnı bozğanını, bu cümleden, rusiye sıñırcıları Keriç boğazından Berdânsk ve Mariupol deñiz limanlarina areket etken ticariy gemilerni  esassız toqtatqanlarını bildirldi.

Borıs Babin işğalci akimiyet qırımlılarnıñ esas aq-uquqlarını ve sebestliklerini, matbuat vastalar serbestligini bozğanını haber etti, işğalci akimiyet tarafından halqara uquq bozulğanına dair misaller ketirdi.

Körüşüv iştirakçileri işğal etilgen yarımadadan mallar muntazam ve qanunsız şekilde Aqrusiyege ketirilgenini ve aqrusiye vekâletli şahıslar tarafından Qırımnı ziyaret etüv meselesini muzakere etip, qoşma sanktsiyalar vastasınen vaqtınca işğal etilgen Qırımdan istilâcınıñ tecavüzine qarşılıq kösterüvni quvetlendirmek kerek olğanını qayd ettiler.

Daimiy Temsilci ecnebiyler içün vaqtınca işğal etilgen Qırımnı ziyaret etüv boyunca mahsus tertip mevcut olğanı ve ukrain qanuniyetini bozğanlar mesüliyetke çekilecekleri aqqında bildirdi.