Sentyabr 28 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ birinci muavini İzet Gdanov AQŞ Halqara inkişaf (USAID) agentliginiñ vekilleri – demokratiya ve idare etüv inkişafına qol tutuv ofisiniñ müdir muavini Den Rayan ve yerli öz-özüni idare etüv ve ademi merkeziyet (detsentralizatsiya) inkişafı boyunca leyhalar idarecisi Marat Kürçevskiy ile körüşti.

Körüşüv devamında taraflar vaqtınca işğal etilgen Ukraina topraqlarında vaziyetni, bu cümleden, Qırımda işğalci akimiyet tarafından insan aq-uquqlarınıñ ve serbestliklerniñ bozuluvı, vatanperver Ukraina vatandaşlarınıñ takip etilüvi ve Qırım Muhtar Cumhuriyeti ve Aqyar şeeri sakinlerine qarşı qanunsız mahkeme qararlarınıñ çıqarıluvını muzakere ettiler. Ayrıca yaqında jurnalist Mıkola Semena ve Milliy Meclis reisiniñ muavini İlmi Umerovnıñ cinaiy işleri boyunca çıqarılğan işğalci akimiyetniñ sözde makeme «qararlarına» emiyet berildi.

Bundan da ğayrı, memleket içinde köçken şahıslarnıñ ve işğal olunğan topraqlardan qıta Ukrainağa memuriy hızmet ve adliy yardım almaq maqsadınen kelip ketken vatandaşlarnıñ aq-uquqları ve serbestlikleri qorçalavınen bağlı bir sıra mesele baqıldı. Birinci nevbette, Qırım sakinlerine qıta Ukrainada rast kelgen migratsiya saasında problemli meseleler aqqında söz yürsetildi.

Ukraina Prezidentiniñ Qırım Muhtar Cumhuriyetindeki Daimiy Temsilcisiniñ birinci muavini İzet Gdanov vaqtınca işğal olunğan topraqlarnıñ sakinleri içün Herson vilâyetiniñ Qırımnen memuriy sıñırına yaqın olğan rayonlarında memuriy hızmet merkezlerni açmağa, infrastruktura inkişafı ile bağlı meselelerni çezmege, bu cümleden, Qırımnen memuriy sıñırında yerleşken «Qalançaq» ve «Çonğar» KÇNN-larnı donatmaqa kerek olğanını qayd etti. “«Çaplınka» KÇNN-na kelgende ise, onı tamamen qapatmağa teklif etile’’, – dep qayd etti İzet Gdanov.

İzet Gdanov AQŞ Halqara inkişaf (USAID) agentliginiñ vekillerine Temsilcilik esasında vaqtınca işğal olunğan Qırım Muhtar Cumhuriyetiniñ aktual meselelerinen oğraşqan iş gruppası teşkil olunğanını bildirdi, bu iş gruppası bir qaç kün evel Herson vilâyetiniñ Geniçesk rayonında birinci tışqı oturışnı keçirdi.

Bundan da ğayrı, Ukraina Prezidentiniñ Qırım Muhtar Cumhuriyetindeki Daimiy Temsilcisiniñ birinci muavini İzet Gdanov Rusiyege qarşı Qırımnıñ işğali içün kirsetilgen sanktsiyalarnı küçlendirmege kerek olğanını qayd etti, bu cümleden deñiz ve ava naqliyatı saasında ve işğalci akimiyetniñ temsilcilerine qarşı sanktsiyalar kirsetilmeli.

İzet Gdanov qayd etkenine köre, Donbas istilâsınen istilâcı memleket halqara cemiyetniñ diqqatını Qırım işğalinden ayırmağa istey, onıñ içün Qırımnıñ qaytarıluvı Ukraina Şarqını da istilâdan azat eter.