2018 senesi oraq (iyül) 25 künü AQŞ Devlet departamenti, RF-nıñ 2014 senesi Ukrainağa tecavüzini ve Qırımnı ilhaq etmek teşebbüsini bütün demokratik milletler tarafından tanılğan halqara uquqnıñ temellerini bozuv olaraq adlandırıp, Qırım deklaratsıyasını beayn etti: dünyadaki iç bir devlet başqa devletniñ sıñırlarını zorbalıqnen deñiştiremez. Bütün memleketler, bu cümleden Rusiye, BMT Nizamnamesiniñ bu esasınen razı olıp, başqa devletlerniñ topraq bütünligine ve siyasiy mustaqilligine qarşı küç qullanuvdan ya da küç qullanuvı ile qorqutuvdan vazgeçmek mecburiyetini aldılar. Bu esas temel Helsinki aktında da aks etilip, cian havfsızlığınıñ esas temellerinden birini teşkil ete.

Öz egemenligini zorbalıqnen kenişletmege niyetlengen Kremlniñ halqara uquqqa zıt kelgen areketlerine cevap olaraq qabul etilgen Qırım deklaratsıyası, 1940 senesi 3 Baltıq devletini ilhaq etmek teşebbüsini tanımama meselesinen bağlı olğan Uellesniñ deklaratsıyası ile amelge keçirilgen AQŞ siyasetiniñ devamını temsil ete. İttifaqdaşlar, ortaqlar ve halqara cemiyet ile beraber AQŞ Qırım deklaratsıyasında Rusiyeniñ Qırımnı ilhaq etmek ıntıluvına qarşı çıqıp, Ukrainanıñ topraq bütünligi tiklenmesine qadar işbu siyasetini devam ettirecegine eminlik bildireler.

Qırım deklaratsıyasında AQŞ Rusiyeni çoq yıllar devamında sözde qol tutqan esaslarğa ürmet etip, Qırımnıñ işğalini toqtatmağa çağıralar. Demokratik devletler serbest, adaletli ve abadan dünyanı qurmağa istey ve başqa devletlerniñ topraq bütünligine ve egemenlikte musaviylikke qol tutmağa devam etecekler. Qırım deklaratsıyası, Rusiye büyük milletke lâyıq olmağan areketler yapıp, halqara cemiyetniñ müitinden ayırıluv yolunen ketmekte olğanını qayd ete.