2018 senesi boş ay (noyabr) 8 künü AQŞ Maliye Nazirliginiñ çetel maliye üzerinde nezaret boyunca İdaresi (OFAC) Qırımda RF işğalci akimiyetine boysunğan bir sıra teşkilâtlarğa qarşı sanktsiyalarını ilân etti.

Bular – sözde ‘‘Sanatoriy Ay-Petri’’, ‘‘Sanatoriy Dülber’’, ‘‘Sanatoriy Mishor’’, ‘‘Krımelektrotsentral’’ (‘‘KrımTETS’’) aktsioner cemiyetleri, sözde ‘‘İnfraterkip leyhalarını idare etken şirket’’, ‘‘Cenübiy leyha’’ ve ‘‘Garant-SV’’ sıñırlı mesüliyetli cemiyetler ve «Mriya Resort & Spa» şirketidir.

OFAC-nıñ ‘‘KrımTETS’’-ke qarşı sanktsiyaları Qırımda işğalciler tarafından qurulıp, avropalı donatmalar ve ukrain menbalardan hırsızlanğan gaz esasında çalışacaq eki dane sıcaq ve elektrik yarığı çıqaruv stantsiyalarnı çalıştırmaq ıntıluvlarğa doğrudan doğru tesir etecektir. OFAC «Mriya Resort & Spa» şirketine qarşı sanktsiyalar onıñ temelinde sözde ‘‘Yalta halqara iqtisadiy forum’’ keçirilgeni ve ‘‘Garant-SV’’ sıñırlı mesüliyetli cemiyet ile RF Sberbankına boysunğanı sebebinden kirsetilgendir. ‘‘İnfraterkip leyhalarnı idare etken şirketine’’ qarşı sanktsiyalar işbu teşkilât Ukrainadan hırsızlanğan ‘‘Ay-Petri’’, ‘‘Dülber’’ ve ‘‘Mishor’’ sanatoriylerni ‘‘satın alğanı’’ içün kirsetildi. Sanktisyalar ‘‘İnfraterkip leyhalarnı idare etken şirketniñ’’ aq saibi, istilâci devletniñ silâlı quvetlerinde raketa ve toplar quvetleriniñ sabıq başlığı Vladimir Zaritskiyge de qarşı kirsetildi. Bundan da ğayrı, Qırımda insan qıynavlarında ve insan aqlarını bozuvda iştirak etken Federal havfsızlıq hızmeti (FSB) ceza bölüginiñ zabiti Andrey Suşkoğa qarşı sanktsiyalar qabul etildi.