Ukraina içün bu kün, vaqtınca işğal etilgen Qırım Muhtar Cumhuriyeti ve Aqyar şeeri topraqlarında Rusiye Federatsiyasınıñ işğalci akimiyeti tarafından işlengen cinayetler aqqında nevbetteki hatırlatuvdır. Aq qorçalayıcı teşkilâtlarnıñ malümatlarına köre, vaqtınca işğal başlanğandan berli Qırım Muhtar Cumhuriyeti ve Aqyar şeeri topraqlarında 44 kişi zorbalıqnen ğayıp oldı. 15 kişiniñ taqdiri ve bulunğan yerleri ale daa belgisiz (https://bit.ly/3fnK0Wr).

Olar, Valeriy Vaşçuk, İvan Bondarets, Vasıl Çernış, Tımur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Kostenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbrayimov ve Ervin İbragimovdır.
Bular, işğalci akimiyetke boysunmağan ukrain ve qırımtatar faalleri ya da olarnıñ soy-soplarıdır.

2014 senesi qural aynıñ 26-da ukrain faali, Aqmescitteki Ukrain halq eviniñ teşkil eticisi Timur Şaymardanov öz evinden çıqıp, keri qaytmadı. Şaatlar ile faalniñ aqrabaları ğayıp oluvda sözde ”Qırım samooboronasınıñ” azaları qabaatlı olğanını aytqan ediler.

2016 senesi qural aynıñ 24-de Bağçasaray şeerinde qırımtatar faali, Bağçasaray regional Qırımtatar Milliy Meclisiniñ azası, Bütündünya qırımtatar kongressi icra komitetiniñ azası, sabıq Bağçasaray rayon şurasınıñ deputatı Ervin İbragimov belgisiz şahıslar tarafından zorbalıqnen ğayıp etilgen edi. Ervin İbragimovnıñ babası onıñ boş arabasını soqaqta tapqan edi. O, hırsızlav adisesini qayd etken video nezaret etüv kamerasından yazuvnı elde etip oldı. Eki şahıs, olardan birisi sözde ”uquq qorçalav organlarınıñ” urbasına kiyingen alda, Ervinni arabasından sürüp çıqardı, mikroavtobusqa oturttı ve alıp ketti. O vaqıttan berli Ervin İbragimovnıñ bulunğan yeri belgisizdir.

İşğalci Rusiye Federatsiyası akimiyeti ğayıp olğanlarnıñ bulunğan yerleri aqqında malümat bermey.
Zorbalıqnen ğayıp etüvler vastasınen Rusiye Federatsiyası ukrain Qırımınıñ vaqtınca işğal etilüvine razı olmağan insanlarnı qorquta, olarnıñ bir-de-bir faaliyetini toqtata.
Ukrain uquq qorçalav organları 36 zorbalıqnen ğayıp oluvnı taqiq etmekteler.

Qırım Muhtar Cumhuriyeti ve Aqyar şeeri Prokuraturası vaqtınca işğal başlanğanından berli Qırım yarımadasında yaşayış ve sağlıq aqlarını bozuv, zorbalıqnen ğayıp oluv, azatlıqtan marum etüv, insanlanı qaçıruv, qıynav ve insaniyetsiz davranuv kibi 400 adise boyunca açılğan 270 kriminal dava üzerinde çalışmaqtadır. Ekseriy allarda kriminal davalar boyunca mahkemeden evel yapılğan taqiqat neticesinde yuqarıda qayd etilgen cinayetlerde işğalci devletniñ ve oña boysunğan işğalci memuriyetniñ vekilleri qabaatlı olğanı belgilendi.

Al-azırda neticeli taqiqatlarnı alıp barmaq pek qıyın, çünki ukrain uquq qoruyucıları vaqtınca işğal etilgen Qırım Muhtar Cumhuriyeti ve Aqyar şeeri topraqlarına irişip olamay, mütenasip zorbalıqnen ğayıp oluvlar içün mesüliyetli olğan işğalci devlet Rusiye Federatsiyası ise taqiqatlarını alıp barmay ya da neticege ketirmegen emiyetsiz areketler yapa.

Eminmiz ki, bu deşetli cinayetler aqqındaki aqiqat ille de cemiyetimizge belli olur, qabaatlı şahıslar ise lâyıq cezalavğa oğratılır.

Ğayıp olğanlarnıñ qorantalarına qol tutuvımıznı bildiremiz! Siziñle beraber olarnı bekleymiz!