Bügün, 2019 senesi qara qış (yanvar) ayı 24 künü AŞPA ”Azaq deñizi ile Keriç boğazı etrafındaki kerginlikniñ artuvı ve Avropa havfsızlığı ögünde turğan telükeler” adlı rezölütsiyanı qabul etti.
AŞPA öz vesiqasında Keriç boğazi civarlarında zapt etilgen ukrain arbiy deñizcilerine cenk esirleri aqqında Jeneva konventsiyası boyunca davranmaqnı Rusiyeden resmiy şekilde talap ete.
”Assambleya RF-ni Jeneva Konventsiyası kibi halqara gumanitar qanuniyetniñ maddelerine binaen ukrain arbiylerni azat etmege ve olarnı kerekli tıbbiy, uquqiy ve/ya da konsul yardımnen temin etmege çağıra”, – dep qayd etile vesiqada.
Assambleya 2018 senesi boş ay (noyabr) 25 künü Azaq deñizi ile Keriç boğazi civarlarında ukrain arbiy gemileri Odesadan Mariupolge sefer yapıp yağalanğan soñ RF ile Ukraina arasındaki kerginlikniñ artuvı boyunca teren raatsızlığını bildire.
”Assambleya Rusiye Federatsiyası ukrain arbiy gemilerine ve olarnıñ taqımlarına qarşı arby küç qullanğanını takbih ete”, – dep qayd etile vesiqada.
Aynı vaqıtta Assambleya rusiye ve ukrain taraflarına Azaq deñizi ve Keriç boğazı boyunca añlaşmağa riayet etmege ve Ukraina ile Rusiye Federatsiyası arasında adliy davalarnı kerginleştire bilecek, kerginlikni arttıra bilecek ve regiondaki havfsızlıq içün telükeler yarata bilecek areketlerden vazgeçmege muracaat ete.
Rezölütsiyada Rusiye Keriç boğazında qanunsız şekilde köpürni qurğanı, böyleliknen Ukrainanıñ egemenligini bozğanı ve ukrain ve halqara gemilerni Azaq deñizinde seçip teşkergeni sebebinden raatsızlıq bildirile.
Assambleya AHİT Mahsus nezaret etici missiyasınıñ mandatını Azaq deñizi regionına keñişletüv boyunca Avropa Parlamentiniñ teklifine qol tuttı.
Bundan da ğayrı, Rezölütsiyada Keriç boğazındaki navigatsiya serbestligini üçünci memleketler tarafından nezaret etmek kibi Almaniya ile Frenkistannıñ teşebbüsine qol tutula.
AŞPA Ukrainağa qarşı Rusiye istilâsınıñ siyasiy neticeleri ve devletimizniñ egemenligine ve topraq bütünligine qol tutuv boyunca bundan evel qabul etilgen rezölütsiyalarğa sadıq qağanını tasdıqladı.
Rezölütsiyağa 103 delegat qol tuttı, 16 kişi tarafsız oldı ve 3 insan qarşı çıqtı.
Bu aqta Ukrinformnıñ Strasburgdaki muhbiri haber ete.