Yuqarıda añılğan qarar Rusiye Federatsiyasınıñ devletimizge qarşı silâlı istilâsı munasebetinen uquqiy cebede Ukrainanıñ müim ğalebesidir. Şu cümleden, Avropa İnsan Aqları Mahkemesiniñ Qırım MC ve Aqyar şeerini işğal etüvnen bağlı birinci qararıdır ve Mahkeme, Ukrainağa ait yarımadanı 2014 senesi kiçik aynıñ 27-de Rusiye öz nezareti altına keçirgenini açıq-aydın tanıdı.
Ögümizdeki nevbetteki müim vazife – Ukraina tarafından beyan etilgen Qırımda insan aqları bozuluvlarğa dair davanıñ baqılmasıdır. Böyleliknen, Mahkeme kelecekte apis etüv, qıynav ve zorbalıqnen ğayıp etüv, avtomatik şekilde vatandaşlıqnı zobalıqnen qabul ettirüv, söz, din ve tınç toplaşuvlar serbestliklerini bastıruv, mülkiyetten marum etüv, ukrain tilini bastıruv, qırımtatarlarnı taqip etüv ve başqa bozuluvlarnı baqıp çıqacaqtır.
Halqara uquq ğalebe qazanacağından eminmiz, Rusiye ise 2014 senesiniñ kiçik ayından başlap bu küngece işğal etilgen yarımadada çoqtan-çoq insan aqlarını bozuv ve vatandaşlarımıznı taqip etüv cinayetleri içün mıtlaqa mesüliyetke çekilecektir.
Ukraina Ükümetini uquqiy cebede ilk müim ğalebesinen hayırlaymız, Adliye Nazirliginiñ taqımına (İvan Lişçina, Margarıta Sokorenko) ve bu qıyın yolda yardımda bulunğan er keske minnetdarlığımıznı bildiremiz. Su cümleden, işğalniñ birinci künlerinden başlap, cinayetlerni qayd etken ve Qırımdaki insan aqları bozuluvlarınıñ qurbanları olğan vatandaşlarımızğa yardım köstergen cemaat ve uquq qorçalav teşkilâtlarına minnetdarmız.
Mahkemeniñ matbuat hızmeti tarafından azırlanğan bildirüvnen bu yerde tanış olmağa mümkün: https://cutt.ly/mjWl8za
Hatırlatamız ki, 2019 senesi berim ayınıñ 11-de işbu dava boyunca Mahkemede keçirilgen birinci halq ögünde diñlevlerni bu yerde baqıp çıqmağa mümkündir: https://cutt.ly/RjWl2Lf