Avropa Parlamenti Rusiye akimiyetinden Qırımda yaşağan qırımtatar halqına ve ukrain ealisine qarşı yapılğan cezalav areketlerini toqtatmağa ve qanunız şekilde apiste bulunğan ukrain siyasiy mabüslerini deral azat etmege talap etti. Bu talap qırımtatar liderleri Ahtem Çiygoz ve İlmi Umerov, em de jurnalist Mıkola Semenanıñ cinaiy işlerine bağışlanğan Avropa Parlamentiniñ cumaaqşamı künü qabul etken qararında yer aldı. Avropa Parlamenti öz qararında Ahtem Çiygoz, İlmi Umerov ve jurnalist Mıkola Semenağa berilgen cezalarnı takbih etip, olarnı ğayrıdan baqmağa, bu şahıslarnı deral azat etmege ve aqlamağa talap ete. Bundan ğayrı, başqa qırımtatar liderlerine ve faalcilerge berilgen cezalar ve başqa ukrain vatandaşlarnıñ, qanunsız şekilde Qırımda ya da Rusiyede apiske qapatıluvı, bu cümleden Roman Suşçenkonıñ esarette bulunması qattı sürette takbih etilip, olarnı deral azatlıqqa çıqarılması talap etildi.
AP, sözde qırım akimiyetiniñ tamır qırımtatar halqına ve rus işğaline qarşı olğan aman-aman er keske qarşı alıp barılğan ayrımcılıq siyasetini, işbu vatandaşlarnıñ mülkiyet aqlarını bozğanını, olarnıñ siyasiy, içtimaiy ve ihtisadiy ayatlarını telükege qoyğanını takbih ete.
Meclisniñ yasaq etilüvi ve aşırıcı teşkilâtlar cedveline kirsetilüvi de qırımtatar halqınıñ aququları bozuluvına misal olğanı qayd etildi. Rusiye Federatsiyası Qırım yarımadasında daimiy şekilde insan aq-uquqlarını bozğanı ayrıca kösterildi. Bundan başqa, Avropa Parlamentiniñ vekilleri, mabüsler Rusiyeniñ uzaq vilâyetlerine köçürilgeni, olarnıñ aileleri ve dostlarınen münasebetlerine keder etkeni ve uquq qoruycılarğa vaziyetni közetmege imkân bermegeni takbih etildi.
AP, Avropa tiş faaliyeti boyunca hızmetini ve Avropa Birliginiñ Rusiyedeki Temsilciligini, yuqarında qayd etilgen şahıslarnıñ zorlı psihiatrik tedaviylevi aqqında haberlerni büyük diqqatnen nezaret etmege çaqırdı ve Avropa Birliginıñ idareleri ve iştirakçi memleketlerniñ temsilcilikleri mabüslernen körüşebileceklerine ümüt etkenini bildirdi. Avropa makemesi, Rusiye adliyesi bu meselelerde adaletli qararlar çıqaramağanı sebebinden, Qırımdan kelgen talaplarnı ilk nevbette müzakere etmege çağırıldı. Bundan da ğayrı, vekiller rus akimiyeti milliy azlıqlarnıñ mustaqil haber vastalarını taqip etkenini takbih etti.
AP insan aq-uquları saasında çalışqan haqara teşkilâtlarnı, bu cümleden, BMT, AHIT ve Avropa Şurasını, Qırımdaki vaziyetni közetmek maqsadınen yarımadanı ziyaret etmek imkânını yaratmağa ve mustaqil közetüvni çalıştırmağa çağıra. Ukrainanıñ, Qırımda insan aqları meselesini BMT Baş Assambleyasınıñ İnsan aqları boyunca şurası seviyesinde çezmege teklifte bulunması da APnıñ qararında alğışlandı. Avropa tiş faaliyeti boyunca hızmeti ve Insan aqları boyunca Avropa Birliginiñ mahsus temsilcisi Qırım yarımadasında bu meselelerge diqqat etmege ve APge malümat bermege çağırıldı.
AP, isan aq-uquqlarnı qanınsız şekilde bozğan şahıslarğa, bu cümleden, Çiygoz, Umerov ve Semenanı qabatlağan makemecilerge qarşı sıñırlayıcı tedbirlerni almağa, yani, Avropa Birligindeki bank esaplarını tosmenge tutmağa ve visa yasaqlamağa çağırdı.
Avropa Birligi tarafından Qırım iqtisadiyatına qarşı qabul olunğan sanktsiyalarğa, bu cümleden, Qırımdan italât ve Qırımğa bazı mal, hızmet ve tehnologiya ihracatı ve yatırım yasaq etilmesine kene de qoltutıldı.
AP, Qırımda işğalci akimiyet vazifesini becergen Rusiye yarımadada yaşağanlarnı adaletsiz mahkeme qararlardan qorçalavı içün tolusınen cevapkâr olğanını hatırlattı. Qararda Ukrainanıñ mustaqilligine, bağımsızlığına ve halqara qanunlarnen tañılğan sıñırları içinde bütünligine qol tutıp, Qırım Muhtar Cumhuriyeti ve Aqyarnıñ Rusiye Federatsiyası tarafından qanunsız işğalini takbih etiller. Avropa Parlamenti Avropa Birliginiñ ve iştirakçi memleketleriniñ Qırım yarımadasınıñ qanunsız işğalini qabul etmegenine ve bu sebepten sıñırlayıcı tedbirlerni alğanına qol tuta.
Bundan da ğayrı, Rusiye Qırım yarımadasını kütleviy şekilde askerileştirgeni, bu ise regional ve umumavropa hafvsızlığına telüke doğurğanı da qabul olunğan vesiqada qayd etile.