2018 senesi fevral 21 künü Ukraina Prezidentiniñ Qırım MC Daimiy Temsilcisi Boris Babin ve Temsilcilikniñ halqara alâqalar ve uquqiy talil hızmetleriniñ veklilleri Avropa Şurasınıñ ‘‘Ukrainada memleket içinde mecburen köçken şahıslarnıñ aq-uquqlarını qüvetlendirüv’’ leyhası boyunca közetici şurasınıñ soñki oturışında iştirak ettiler.
Oturışta Vaqtınca işğal etilgen topraqlar ve devlet içinde köçken şahıslar meseleleri boyunca nazirniñ muavini, Ukraina içtimaiy siyaset naziriniñ muavini, Ukraina adliye nazirinin muavini, Avropa Şurası Baş kâtibiniñ Ukraina boyunca mahsus temsilcisi, Ukrainada Avropa Şurası ofisiniñ başlığı, Ukraina Yuqarı Şurasınıñ insan aqları boyunca vekâletlisiniñ memleket içinde mecburen köçken şahısları boyunca vekili, Avropa Şurası Leyhasınıñ başlıqları ve danışmanları, merkeziy icra akimiyetiniñ ve cemaat teşkilâtlarınıñ temsilcileri iştirak ettiler.
Leyhanıñ baş maqsadı – memleket içinde mecburen köçken şahıslarnı qorçalav tertibatını ve ilk nevbette mütenasip normativ-uquqiy bazanı mükemmelleştirmek, Avropa ve universal standartlarına binaen qullanmaqtır. Oturış devamında Leyhanıñ faaliyeti aqqında esabat berildi, onıñ esas neticelerine qıymet kesildi. Bundan da ğayrı, Leyhanıñ yardımı ile azırlanıp, memleket içinde mecburen köçken şahıslarnıñ qorçalavını maqsat olaraq qoyğan qanun leyhaları qayd etildi, mezkür meseleler boyunca İnsan aq-uquqları boyunca Avropa Makemesiniñ cari olğan ameliyatı taqdim etildi. Avropa Şurası Leyhasınıñ başlığı Ganna Hrıstova leyhanıñ iştirakçilerini, esas tedbirlerini ve neticelerini taqdim etti.
Leyha çerçivesinde memleket içinde mecburen köçken şahıslar içün bedava uquqiy yardım merkezi ile işbirlik aqqında haber etildi. Ukraina Prezidentiniñ Qırım MC Daimiy Temsilcisi Leyhanıñ ketişatı ve neticeleri boyunca Temsilcilikniñ nazar noqtasını beyan etip, leyhanı devam etmege kerek olğanını qayd etti. Daimiy Temsilci, memleket içinde mecburen köçken şahıslarnıñ uquqlarınıñ tasdıqlanuvı, qanuniy yolcu taşımalarınıñ teşkil etilüvi, KÇNN-nıñ abadanlaştırıluvı, memleket içinde mecburen köçken şahıslarnıñ aq-uquqlarına yaşağan yerlerine baqmadan riayet etilmesiniñ nezareti kibi acele sürette çezilecek esas meselelerni tarif etti.
Temsilcilik öz vekâleti çerçivesinde memleket içinde mecburen köçken şahıslarnıñ aq-uquqlarına riayet etmek, olarğa ertaraflama yardımnı bermek, olarnıñ gumanitar meselelerini çezmek, qıta Ukrainada memuriy hızmetlerni bermek içün bütün mümkün olğan çarelerni körgeni qayd etildi. Oturışnıñ soñunda toplaşuvnıñ iştirakçileri memleket içinde mecburen köçken şahıslarnıñ içtimaiy meselelerini, kelecekte ortaq faaliyetiniñ maqsadını ve planını, bu cümleden, mevcut olğan qanunlarnıñ yerine ketirilmesini, ya da olarğa deñişmeler kirsetilmesini, yañı qanunlarnıñ azırlanmasını muzakere ettiler.
