2018 senesi ilk yaz ayı (iyün) 28 künü Avropa Şurasınıñ Parlament Assambleyası ‘‘Rusiye Federatsiyası tarafından siyasiy mabuslar olaraq tutulğan Ukraina vatandaşları’’ mevzusında 2231 (2018) sanlı rezölütsiyanı qabul etti. Bu vesiqa Ukrainağa qarşı rusiye istilası boyunca AHIT-niñ evelki aktlarına (1990 (2014), 2034 (2015), 2063 (2015), 2112 (2016), 2132 (2016), 2133 (2016) ve 2198 (2018) rezölütsiyalarına) esaslana.

2231 (2018) sanlı rezölütsiyasında Avropa Şurası, yarımada silâ vastasınen işğal etilgeni sebebinden Qırımda insan aqlarınıñ temin etilüvi RF-nıñ mecbüriyeti olğanını, insan aqları saasında vaziyet işğalge qarşı çıqqan faalcilerniñ ölümleri ve zorbalıqnen ğayıp oluvları, cemaat teşkilâtlarğa ve matbuat vastalarğa qarşı areketler ve telükeler, temel qırımtatar halqına qarşı zorbalıq ve cezalavlar sebebinden beterleşkenini bir kere daa hatırlata.

Rezölütsiyada Qırımnıñ sakinleri RF pasportlarını almağa mecbur olğanı ve Qırımda ve Rusiyede maküm etilgen Ukraina vatandaşlarınıñ ekseriyeti siyasiy ya da sahte işler boyunca taqip etilgeni bildirile. 70-ten ziyade böyle adise qayd etilip, Oleg Sentsov, Volodımır Baluh ve Pavlo Gribniñ cinaiy işlerine ayrıca diqqat çekildi, olarnı AHIT-niñ 1900 (2012) rezölütsiyası boyunca tolu derecede siyasiy mabuslar olaraq tanımaq mümkün. 2231 (2018) sanlı rezölütsiyada siyasiy mabuslar açlıq tutqanları qayd etilip, olarğa qarşı sert davranış ve tıbbiy yardımğa irişimniñ yoqluğı içün raatsızlıq bildirile, Oleg Sentsov insan aqları boyunca Ukraina vekâletlisi ile körüşip olamağanı da qayd etildi. Avropa Şurası Parlament Assambleyası (AŞPA) İnsan aqları boyunca Avropa mahkemesiniñ Qırımda ve RF-da makum etilgen şahsılar boyunca qararlarnı yerine ketirüvniñ nezaretini yapmağa azır olğanını bildiridi.

2231 (2018) rezölütsiyasında Avropa Şurası Parlament Assambleyası Rusiyeden:

– Qırımda ya da Rusiyede maküm etilgen cemi Ukraina vatandaşlarını azat etmege ve Donbas ile Rusiyeniñ semereli nezareti altında bulunğan topraqlarda maküm etilgenlerni azat etmek içün bütün kerekli areketlerni yapmağa;

– olarnıñ azat etilmelerine qadar olarnıñ aq-uquqlarına tolu derecede ürmet etmege, bu cümleden, qıymavlardan, insaniyetsiz, ya da sert davranışlardan vazgeçmege ve tıbbiy yardımğa irişimlerini temin etmege;

– bütün qayd etilgen makümlerniñ mustaqil halqara teşkilâtlar, bu cümleden, Qıynavlarğa qarşılıq kösterüv boyunca Komitet ve Halqara Qızıl Haç Komiteti tarafından nezaret etilmesine  ve ukrain memurları, bu cümleden, ombudsmen tarafından ziyaret etilmesine ruhset bermege;

– Qırımda RF vatandaşlığını qabul etmege zorlamamağa ve Ukraina vatandaşlarnı Qırımdan Rusiyege zorbalıqnen ve cinaiy işler çerçivesinde keçirüvden vazgeçmege;

– Qırımtatar Milliy Meclisiniñ yasaq etilüvini lâğu etmege ve Mustafa Cemilevge ile Refat Çubarovğa Qırımğa kelmege ruhset etmege;

– qırımtatar halqına ve onı temsil etken şahıslarğa, bu cümleden, adliyecilerge ve uquq qorçalayıcılarğa basqı etmekni, olarnı taqip etmekni  toqtatmağa çağıra.

2231 (2018) sanlı AŞPA rezölütsiyanıñ tolu metini bu yerdedir:

http://assembly.coe.int/nw/xml/XRef/Xref-XML2HTML-EN.asp?fileid=24994&lang=en