2018 senesi saban ayınıñ (mart) 22 künü Avstraliyanıñ Ukrainadaki Vefqulade ve Tolu vekâletli elçisi Melissa hanım O’Rurk Herson vilayetine ziyareti çerçivesinde Ukraina Prezidentiniñ Qırım Muhtar Cumhuriyetindeki Daimiy Temsilcisi Borıs Babin ile körüşti. Taraflar dialog şekilinde halqara uquq ceetten Qırımdaki adiselerni, bu cümleden, halqara cemiyetniñ Rusiyege qarşı işletken siyasiy ve iqtisadiy tedbirlerni işğalci devlet körmemezlikke urğanını muzakere ettiler.

Melissa hanım Qırımda yaşağan Ukraina vatandaşlarınıñ hususan yarımadada keçirilgen sözde RF prezidenti ‘‘saylavları’’ munasebetinen problemaları, ana tilde tasil saasında ukrainalılar ve qırımtatarlar aq-uquqlarınıñ bozuluvı, yarımadanıñ silâlaştırıluvı, medeniy yadikârlıqlarınıñ yoq etilüvi, qırımtatar halqı aq-uqularınıñ kütleviy sürette bozuluvı ile meraqlandı. Borıs Babin temel qırımtatar halqınıñ tarihı, stalinizm yıllarından başlap bügünki künlergece onıñ tarihiy Vatanı içün küreşi, işğalciniñ temel halqlarğa, etnik ukrainalılarğa ve yarımadanıñ milliy azğınlıqlarına basqısı aqqında qısqadan ikâye etti.

Daimiy Temsilci musafirni Temsilcilikniñ devlet organı olaraq faaliyeti, vaqtınca işğal etilgen Qırımda yaşağan ya da memleket içinde mecburen köçken Ukraina vatandaşlarınıñ esas aq-uquqlarına riayet etilmesi ve çeşit türlü meseleleriniñ çezilmesi maqsadınen Temsilcilik tarafından icra akimiyetniñ faaliyetine qol tutuv ve doğrultuvı ile tanıştırdı, Temsilcilikniñ esas yönelişlerini ve al-azırda birinci nevbetteki vazifelerini belgiledi.

Bundan da ğayrı, Borıs Babin Herson vilayetiniñ Qırımğa yaqın olğan mesken yerlerinde Memuriy hızmet merkezleriniñ teşkil etilüvi ve donatıluvı, ‘‘Qırım-Ukraina’’ leyhası çerçivesinde 2018 senesi kiriş kamğaniyasına azırlanuvı ve Avropa Şurasınıñ Nazirler Komiteti tarafından kiçik ay (fevral) 21 künü qabul etilgen Ukraina içün kelecek yıllarğa Areket planınıñ yerine ketirilüvi ve Avropa Şurasınıñ yañı leyhası çerçivesinde bu Planğa vaqtınca işğal etilgen Qırımdan memleket içinde köçken şahıslarnıñ qorçalavı meselesiniñ kirsetilüvi aqqında tarif etti.

Elçi hanım Daimiy Temsilcige teren mundericeli ve meraqlı körüşüv içün teşekkür etti ve kelecekte Herson vilâyetini tekrar ziyaret etmege vade etti, taraflar kelecekte işbirlik aqqında añlaştı.