2018 senesi ekim (oktâbr) ayı 10 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov ve Temsilcilikteki uquqiy talil ve halqara alâqalar hızmetleriniñ hadimleri Azaq deñizinde balıqçılıq meseleleri boyunca Ukraina-Rusiye komissiyasınıñ Ukrainada 2018 senesi ekim ayı 23-25 künleri keçirilecek oturışına azırlıq muşaverede iştirak ettiler.

Muşaverede Ukraina balıqçılıq hocalığı Devlet agentliginiñ, Ukraina adliye Nazirliginiñ, Ukraina havfsızlıq Hızmetiniñ, Ukraina ekologiya ve tabiat menbaları Nazirliginiñ hadimleri, ‘‘Ukraina balıqçılıq şirketleri assotsiatsiyası’’ cemaat birliginiñ azası, ‘‘Vilâyetler arası Şimaliy-Azaq balıqçı birligi’’ Assotsiatsiya şurasınıñ yolbaşçısı iştirak ettiler.

Muşavere esasında balıqçılıq meseleleri boyunca Komissiya toplaşuvınıñ teşkiliy meseleleri, Komissiya toplaşuvınıñ kün tertibine kirsetilecek meseleler, kelecekte iştirakçilerniñ işbirligi ve faaliyetlerini yönetüv muzakere etildi.

Temsilcilik öz vekâletleri çerçivesinde Komissiya toplaşuvınıñ kün tertibi boyunca öz tekliflerini taqdim etti.