2018 senesi qural ay (mayıs) 31 künü Temsilcilikte uquqiy talil hızmetiniñ baş mesleatçısı Ruslan Seydametov Ukraina balıq hocalığı devlet agentligi tarafından ukrain balıqçılarnıñ Azaq deñizinde balıq avlama yerlerine telükesiz irişimleri boyunca Kıyiv şeerinde keçirilgen bölükler arası muşaverede iştirak etti.

Bölükler arası muşavere devamında Balıq hocalığı ve balıq sanayısı boyunca Ukraina Devlet komiteti ile RF balıqçılıq Komiteti arasında Azaq deñizinde balıq avlaması boyunca 1993 senesi imzalanğan Añlaşmanıñ, Azaq deñiziniñ ve Keriç boğazınıñ işletilüvi boyunca 2003 senesi imzalanğan Аñlaşmanıñ deryal toqtatılması boyunca Temsilcilikniñ noqtaiy-nazarı bildirildi. 1993 senesi imzalanğan Añlaşma ciddiy qaparcılıq ve havfsızlıq telükeler doğurğanı qayd etildi. Yazıqlar olsun ki, icra akimiyetiniñ ayrı temsilcileri bu añlaşmalarnıñ toqtatıluvına kesen-kes qarşı çıqtılar.

Temsilcilikniñ vekâletli hadimi ‘‘İçki suvlar, territorial deñiz ve onınen bağlı daire’’ aqqında Ukraina qanunını acele sürette qabul etmege kerek olğanını qayd etti.

Qoşma olaraq, ukrain ‘‘Nord’’ balıqçı gemisiniñ taqımınen bağlı meselede rusiye diplomatlarınıñ areketlerine lâyıq uquqiy qıymet kesmek kerek olğanı qayd etildi ve bu iş boyunca imayecilerge Qırımdaki RF işğalci akimiyeti tölegeni belli olğanı bildirldi. Bu iş boyunca ayrı şahıslarnıñ areketleri qaçaq avcılıq alâmetlerini taşıy, olar keçersiz vesiqalarnı işleteler. Mütenasip areketlerge protsesual ceetten deral qıymet kesmege teklif etildi.

Azaq deñizinde Ukraina Devlet sıñır hızmeti Deñiz bekçileriniñ ve Ukraina Arbiy Quvetleri Arbiy-Deñiz Quvetleriniñ ameliy qabiliyetlerini quvetleştirmege kerek olğanına kene de diqqat etildi. Ayırıcı yolaqnıñ yanındaki Azaq-Sivaş milliy parkında biologik resurslarnıñ qanunsız şekilde istisalı tek tabiat-qoruq fondunıñ yoq etüvi degil de, aynı vaqıtta istilâcı devletniñ mütenasip teşkilâtları tarafından idare etilgeni içün havfsızlıq telükelerini doğura, buña da qarşılıq köstermege kerek olğanı qayd etildi.