2018 senesi oraq ayı (iyül) 16 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov ve Temsilcilikte halqara alâqalar hızmetiniñ hadimleri Keriç boğazından ukrain limanlarına ya da işbu limanlardan yaldağan ukrain gemilerniñ  RF tarafından muntazam şekilde toqtatıluvı ve teşkerilüvi boyunca Ukraina infrastruktura Naziri Yuriy Lavrenüknıñ yolbaşçılığında keçirilgen muşaverede iştirak ettiler.  Muşaverede Ukraina çetel işler Nazirliginiñ, Devlet sıñır hızmetiniñ, Ukraina havfsızlıq hızmetiniñ, Tışqı istihbarat hızmetiniñ, Naqliyatta havfsızlıq boyunca devlet hızmetiniñ, Ukraina deñiz limanları memuriyetiniñ, Deñiz qıdıruv-qurtaruv hızmetiniñ, ‘‘Çetel işler Maydanı’’ Fondunıñ vekilleri ve başqa şahıslar da iştirak etti.

Yuriy Lavrenyuk teşkerüv içün tutulğan gemilerniñ miqdarı kün-künden artıp, al-azırda 148 gemini teşkil etkenini bildirdi. ‘‘Ukraina deñiz limanları memuriyeti er kün Mariupol ile Berdânsk limanlarına ya da bu limanlardan areket etken gemilerniñ Rusiye Federatsıyasınıñ mahsus hızmeti tarafından teşkerüv içün tutulğanlarını qayd ete. Bütün malümatlar Ukraina infrastruktura Nazirligi tarafından Ukraina çetel işler Nazirligine yollanıla. Gemilerniñ kapitanlarından, Berdânsk ve Mariupol limanlarında çalışqan agentlerden, limanlarnıñ memuriyetlerinden ve halq deputatlarından sebepsiz tutulğan gemi miqdarınıñ artmasına çoqtan-çoq şikâyetler alamız. Bunı toqtatmalımız. Rusiye Federatsiyasınıñ qanunsız areketlerine qarşı Ukrainanıñ qarşılığı boyunca umumiy nazar noqtamızını eñ qısqa vaqıtta azırlamaq kerekmiz’’, – dep qayd etti Yuriy Lavrenyuk.

Birinci muavin İzet Gdanov Berdânsk ve Mariupol deñiz limanlarınıñ faaliyetini başqa yollarnen temin etüv, Azaq deñizinde Ukraina devlet sıñırını deral teşkil etüv ve bu suvlarda devletimizniñ arbiy küçlerini çoqlaştıruv kibi meselelerge toplaşuv iştirakçileriniñ diqqatlarını çekti. Muşavereniñ neticesi olaraq, kelecekte yapılacaq areketler ve al-azırda ameliyatqa keçirilgen tedbirler boyunca Ukraina devlet organlarınıñ umumiy nazar noqtası teşkil etilip, bir sıra umumiy qararlar da qabul etildl.