Bazar künü, yani 2018 senesi boş ay (noyabr) 25 künü Rusiye Federatsiyası Federal havfsızlıq hızmeti (FHH) Sıñır hızmetiniñ gemisi ”Berdânsk” ve ”Nikopol” kiçik zırhlı topçı katerleri ile beraber bütün ameldeki çoq ve ekitaraflama añlaşmalarğa ve navigatsiya qaidelerine riayet eterek, Odesadan Mariupolge planlaştırılğan seferni yapqan ”Yañı qapı” ukrain reyd buksirini urıp teşti.
Ukraina Silâlı quvetler Arbiy-deñiz quvetleri komandanlığınıñ matbuat merkezi haber etkenine köre, aynı şu künü bir qaç saat soñra Rusiye Federatsiyası FHH Sıñır hızmetiniñ katerleri Keriç boğazından Qara deñizge çıqıp, Odesağa qaytqan Ukraina Arbiy-deñiz küçleriniñ gemileri taqımına qarşı ateş açtı. Ücümleri neticesinde Ukraina Silâlı quvetler Arbiy-deñiz quvetleriniñ 6 askeri yaralandı, 23 kişi esirge alındı. Gemilerniñ üçü de vaqtınca işğal etilgen Qırım Muhtar Cumhuriyetiniñ Keriç şeerine zorbalıqnen sürüklenip alıp ketildi. Olarnen bağ kesildi.
Keççe Rusiye Federatsiyası FHH silâ qullanğanını tasdıqladı ve Ukraina Silâlı quvetleri Arbiy-deñiz quvetleriniñ 3 askerine tıbbiy yardım berilgeni aqqında haber etti. Bundan da ğayrı, FHH Rusiye Federatsiyası devlet sıñırlarınıñ bozuluvı boyunca cinaiy iş açqanını haber etti, onıñ fikirince, ukrain gemileri ”Rusiye Federatsiyasınıñ vaqtınca qapatılğan territorial suvlarına qanunsız alda kirdiler”.
Bir sıra qabul etken vesiqalarında BMT Ukrainanıñ topraq bütünligine ve mustaqilligine qol tutqanına, em de Rusiye Federatsiyası tarafından işğal etilgen Qırım ve Azaq ile Qara deñizleriniñ mütenasip qısımları üzerinde Ukrainanıñ egemenligini tanığanına diqqat celp etmek isteymiz.
Qara ile Azaq deñizlerine ve Keriç boğazına Ukrainanıñ serbest irişimini halqara uquq ve bu cümleden BMT Nizamnamesi ve 1982 senesi imzalanğan deñiz uquqı boyunca BMT Konventsiyası, em de Azaq deñizi ile Keriç boğazını qullanuv boyunca 2003 senesi imzalanğan işbirlik aqqında Añlaşma kefil etkenlerini qayd etemiz. Onıñ içün Rusiye Federatsiyası bundan evel Baltıq deñizindeki Visla körfezinde Baltıq memleketlerine ve Lehistanğa qarşı yapqanı kibi, olarnı tösmenge tutmamalı.
Böyle areketlerge Rusiye Federatsiyasınıñ Ukrainağa qarşı devam etken silâlı tecavüziniñ kerginleşüvi ve Azaq deñizinde havfsızlıq saasındaki vaziyet Avropa içindeki davanıñ telükeli seviyege irişüvi dep qıymet kesemiz.
BMT Havfsızlıq Şurasınıñ azalarını 2018 senesi boş ay 26 künü acele toplaşuvlarında Rusiye Federatsiyasından Ukrainağa qarşı silâlı istilâsını toqtatmağa, Ukraina Silâlı quvetler Arbiy-deñiz quvetleriniñ esir etilgen arbiylerini azat etmege, halqara gumanitar uquq boyunca olarnı cenk esirleri olaraq tanımağa ve olarğa qarşı açılğan ve halqara uquqqa zıt kelgen bütün cinaiy işlerni qapatmağa talap etmelerini rica etemiz.
Bundan da ğayrı, BMT Havfsızlıq Şurasınıñ azalarını Rusiye Federatsiyasından Ukraina Silâlı quvetler Arbiy-deñiz quvetleriniñ esirge alınğan arbiyleriniñ sağlıq vaziyetleri ve olarğa berilgen tıbbiy yardım aqqında tolu malümat bermekni, olarnıñ Ukrainanıñ resmiy temsilcileri ve halqara cemaat teşkilâtlarınıñ vekilleri tarafından ziyaret etilüvini temin etmekni, zapt etilgen arbiy gemilerni Ukrainağa qaytarmaqnı ve ketirilgen zararlarnı tazmin etmekni talap etmege çağıramız.