Prezident Petro Poroşenko qayd etti ki, Ukraina Azaq deñizini ve Keriç boğazını nasıl qullanacağını Rusiyege qarar ettirmez ve öz menfaatlarını qorçalamaq içün bütün uquqiy vastalarını işletir.

”Rusiye şimdi Azaq deñizini işğal etmege tırışa, biz bunı iç bir vaqıt qabul etmemiz. Biz iç bir vaqıt Keriç boğazınıñ işğal etilüvini tanımamız. Biz halqara uquqqa esaslanamız ve Keriç boğazınen Azaq deñizini qullanacaqmız”, – dep bildirdi devletimizniñ Başlığı CNN Türk kanalına bergen intervyusında.

”Azaq deñizi devletimniñ şarqındaki çoq millionlı ealiniñ iqtisadiy faaliyet yeridir. Rusiye mustaqil ve egemen Ukraina devleti yerine biz Azaq deñizini nasıl qullanacağımıznı qarar etecegi aqılğa yatqan şey degil. Biz buña yol bermemiz”, – dep qayd etti Petro Poroşenko.

Prezident rusiye arbiyleri Qara deñiziniñ umumiy suvlarında ukrain gemilerine ücüm etip, ukrain deñizcilerini esirge alğanını hatırlattı. ”Bu vaqia Keriç boğazınen sıñırlanmadı. Rusiye askerleri ukrain flotunıñ arbiy gemisine ücüm etip, 30 mm silâdan menim deñizcilerime qarşı sebepsiz ateş açtı, olarğa ücüm etti ve ukrainalılarnı bu areketlerge cevap olaraq ateş açtıracaq oldılar”, – dep bildirdi devletimizniñ Başlığı.

O, rusiyeliler umumiy suvlarda ücüm etkenlerine dair Ukrainada isbatlar olğanını bildirldi. ”Bizde video, radio yazılar, satellitten yapılğan resimler – er şey bar. Qara deñiziniñ umumiy suvlarında, em de Türkiyeden uzaq degil bir yerde”, – dep qayd etti Prezident.

”Ve Rusiye provokatsiya aqqında söz yürsetemi? Bu açıq halqara suvlar, bu Ukrainanıñ içki suvlarıdır. Halqara uquq ve eki taraflama añlaşmamız bar, olarğa köre Keriç boğazı em Ukrainağa, em Rusiyege ait olğan umumiy boğazdır. Eki kiçkene arbiy gemi yerlerini deñiştirmek içün Odessadan Mariupolge planlaştırılğan seferlerini yapa ediler. Olarda qoşma silâ, qoşma taqım azaları, ya da başqa şeyler yoq edi”, – dep qayd etti devletimizniñ Başlığı.

Petro Poroşenko qayd etti ki, ukrain gemilerine ücüm etmege kim ve nasıl sebepten qarar etkenini Rusiye añlatıp olamay. ”Ne de olsa, bu tecavüziy areketlerdir. Rusiye Federatsiyası menim gemilerime ücüm etkeni içün adliy mesüliyet çekmeli. Al-azırda 24 ukrain gemicisi Moskovada bulunmaqta. Rusiye mahkemesiniñ olarnı mahkeme etmege aqqı yoq. Jeneva konventsiyası boyunca, olar cenk esirleri vaziyetinde bulunalar. Rusiye deral menim askerlerimni qaytarmalı”, – dep bildirdi Prezident.

Devletimizniñ Başlığı qayd etti ki, ukrain gemicilerini azat etmege Putinden ”Büyük yigirmilik” memleketleriniñ Buyenos-Ayresteki sammiti, Avropa Birligi, NATO, ”Büyük yedilik” memleketleri, AQŞ, Kanada, Yaponiya ve başqa devletler talap etti. Bütün dünya talap etti. Ne içün böyle oldı? Çünki Putin ne yapqanını, ne içün ateş açqanını, arbiy gemilerge ne içün ücüm etkenini añlatamadı. Vaziyet beterleşe”, – keder ile dep bildirdi Petro Poroşenko ve Rusiyeni muzakereler masasında tutmaq içün oña qarşı sanktsiyalar işletilgenini hatırlattı.

Prezident Qara deñizde havfsızlıq meselesine de diqqat çekti. O, bu mesele Qaradeñiz regionınıñ bütün devletleri – Ukraina, Türkiye, Bulğaristan, Romaniya, Gürcistan içün pek muim olğanını qayd etti. ”Ve yalıñız Rusiye vaziyetni kerginleştirmeğe tırışa”, – dep qayd etti Petro Poroşenko.

Bu munasebet ile devletimizniñ Başlığı, Rusiye yañı uçaqsavar mudafaa C-400 kompleksi, yañı gemisavar kompleksi şimdi Keriçte ve Kefede bulunğanını añlatmaq mecburiyetinde olğanına eminligini bildirdi. ”Bunı qabul etmek asla mümkün degil. Qara deñizini arbiyleştirmelerine yol bermemiz. Ve bu vaziyette cevap bermege azır olmalımız”, – dep bildirdi Prezident.