2018 senesi boş ay (noyabr) 15 künü BMT Baş Assambleyasınıñ Üçünci Komiteti ‘‘Ukrainanıñ Qırım Muhtar Cumhuriyetinde ve Aqyar (Sevastopol) şeerinde insan aqları saasında vaziyet’’ mevzusında yañı rezölütsiya leyhasını qabul etti. Vaqtınca işğal etilgen Qırım boyunca BMT mahsus rezölütsiyasına evelden 67 memleket qol tuttı, 35 devlet onıñ müellifdeşi oldı.
Rezölütsiyada Ukrainanıñ qısımı olğan Qırım Muhtar Cumhuriyetini ve Aqyar şeerini Rusiye tarafından işğal etüv bir kere daa takbih etilip, ilhaq qabul etilmegeni tasdıqlana, Qırımnı silâ yardımınen zapt etüv qanunsız sayıla, buña halqara qanuniyetni bozuv olaraq qıymet kesile ve bu topraqlarnı Ukrainağa qaytarmağa talap etile.
İştirakçi devletler Rusiye evelki rezölütsiyalarnıñ talaplarını ve halqara teşkilâtlarnıñ, BMT mahsus idareleriniñ ve organlarınıñ mütenasip qararlarını yerine ketirmegeni ile raatsızlanğanlarını, Ukrainanıñ halqara uquqqa riayet etmek ıntıluvlarına qol tutqanlarını bildireler.
Bundan da ğayrı, vesiqada Ukraina vatandaşlarını siyasiy sebepten taqip etüv ve milliy mensübiyet ceetten ayrımcılıq takbih etile, Rusiyede ve vaqtınca işğal etilgen Qırımda qanunsız alda maküm etilgen bütün ukrainalılarnı azat etmege talap etile. Bu munasebet ile ayrıca Oleg Sentsovnıñ, Volodımır Baluhnıñ, Emir-Usein Kukunıñ ve başqa siyasiy mabuslarnıñ adları añıla.
Rezölütsiya leyhasında istilâci devletni yarımadada Ukraina vatandaşlarnıñ aq-uquqlarını ve serbestliklerini ğayrıdan tiklemek, rusiye topraqlarında ve işğal etilgen Qırımda maküm olunğan Ukraina vatandaşlarınıñ halqara tıbbiy teşkilâtlarnı temsil etken ekimler ve ukrain memurlar tarafından ziyaret etilüvini temin etmek kibi BMT Halqara Mahkemesi 2017 senesi çiçek (aprel) ayı 19 künü qabul etken qararnı yerine ketirmege israrlıqnen çağıralar.
Aynı vaqıtta, RF-dan Qırım sakinlerini öz arbiy ameliytlarına celp etüvni ve rusiye vatandaşlığını qabul etmegen Ukraina vatandaşlarınıñ yarımadadan sürgün etilüvini toqtatmaq talabı bildirile. Rezölütsiyada halqara teşkilâtlar ve mahsus BMT idareler resmiy vesiqalarında ukrain yarımadanı ‘‘Rusiye Federatsiya tarafından vaqtınca işğal etilgen Qırım Muhtar Cumhuriyeti ve Aqyar şeeri (Ukraina)’’ olaraq adlandırmağa çağırıla.