2018 senesi ilk qış (dekabr) ayı 17 künü Birleşken Milletler Teşkilâtınıñ Baş Assambleyası ”Qırım Muhtar Cumhuriyetiniñ ve qısmen Qara ile Azaq deñizlerleriniñ arbiyleştirilüvi meselesi” adlı rezölütsiyanı qabul etti.

Qırımnıñ ve Azaq ile Qara deñiz rayonlarınıñ arbiyleştirilüvi aqqında rezölütsiyanı 40 müellifdeş devletler ile beraber Ukraina eyeti taqdim etti. Rezölütsiyanı taqdim eter eken, Ukraina çetel işler Naziriniñ muavini Sergiy Kıslıtsâ bütün devletlerni rezölütsiyağa qol tutmağa, Rusiyeni ise Qara deñizde zapt etilgen 3 gemi ile 24 taqım azalarını azat etmege çağırdı.

Rezölütsiyada ”Qırımda rusiye ordusınıñ bulunması Ukrainanıñ milliy egemenligine, siyasiy mustaqilligine ve topraq bütünligine zıt kele, Avropa regionındaki qomşu devletleriniñ havfsızlığını ve istiqrarını zayıflata” dep qayd etile. Rezölütsiyada ”işğalci devlet Rusiye tarafından Qırımnıñ toqtamadan arbiyleştirilüvi” boyunca ciddiy raatsızlıq” bildirile. Müellifler ”kerginlikniñ havflı derecede artmasını” ve ”Qara deñizde Rusiye tarafından Ukrainağa qarşı aqlanmağan tarzda silâ qullanuvnı” ve bu cümleden boş ay (noyabr) 25 künü Ukraina ADQ üç gemisini zapt etüvni qayd eteler.

BMT Baş Assambleyası Rusiyeni ”deral ve iç bir türlü şart qoymadan gemilerni ve olarnıñ taqımlarını azat etmege” ve Ukrainanıñ Qara ve Azaq deñizlerinde, Keriç boğazında navigatsiya aqlarını ve serbestligini bozmamağa çağıra. Vesiqada Rusiye tarafından Keriç boğazında ”Rusiye Federatsiyası ile vaqtınca işğal etilgen Qırım arasında” köpürniñ quruluvı takbih etile.

”Baş Assambleya israrlıqnen işğalci devlet olğan Rusiye Federatsiyasını Qırımdan öz arbiy küçlerini çıqarmağa ve Ukraina topraqlarınıñ vaqtınca işğal etilüvini toqtatmağa çağıra”, – dep qayd etile rezölütsiyada.

Rezölütsiya leyhasına 66 devlet qol tuttı, 19 qarşı çıqtı, 72 ise tarafsız oldı.

Daa tafsilâtlı malümatnı bu yerde oquñız:  https://news.un.org/ru/story/2018/12/1345311