BMT Baş Assambleyasınıñ 73 sessiyasındaki umumiy tartışmalarda çıqışta bulunğan Ukraina Prezidenti Petro Poroşenko, Rusiyege halqara uquqnıñ küçüni is ettirmege ve yapqan cinayetleri içün onı mesüliyetke çekmege çağırdı.

Bu maqsat ile Ukraina RF qarşı halqara mahkemelerde bir sıra davalar açtı. Ukraina Prezidenti aytqanına köre, olarnıñ arasında –işğal etilgen Qırım yarımadasında Meclisniñ faaliyeti boyunca BMT mahkemesiniñ qararıdır. ‘‘2017 senesiniñ başında BMT Halqara mahkemesi Rusiyege işğal etilgen Qırımda qırımtatar halqınıñ temsilci organı olğan Meclisniñ faaliyetini yasaq etüvni lâğu etmege emir etken edi. Buña baqmadan, bu qararnı körmemezlikke urmağa devam etken Rusiye, em öz halqara mesüliyetlerini yerine ketirmey, em de Mahkemege ürmetsizligini numayış ete’’, – dep qayd etti Petro Poroşenko.

‘‘İşğalden soñ Rusiye Qırım yarımadasını em Ukraina, em de bütün Qaradeñiz regionı içün telüke yaratqan arbiy bazağa çevirdi’’, – dep hatırlattı öz çıqışında Ukraina Prezidenti. ‘‘Rusiyeniñ Qırımnı ve Aqyar şeerini işğal etmek ıntıluvından 4 yıldan ziyade vaqıt keçti. Rusiye işğali şaraitlerinde Qırım bütün Qaradeñiz reğionınıñ havfsızlığı ve istiqrarı içün telüke yaratqan arbiy bazağa çevirildi’’, – dep bildirdi BMT Baş Assambleyasınıñ umumiy tartışmalarında çıqışta bulunğan Devletimizniñ başlığı.

Qanunsız Qırım işğaliniñ birinci künlerinden başlap, qırımtatarlar ve etnik ukrainler ayrımcılıqqa ve basqığa oğradı’’, – dep qayd etti Ukraina Prezidenti. Bir çoq öldürüv, qıynav, taqip etüv ve uydurılğan qabaatlavlar esasında tevqif qayd etildi. Qırımda rusiye işğalci tertibiniñ qurbanları cedveli kün-künden artmaqta. Sañki bügünki işğal etilgen yarımadada qırımtatar ya da ukrain olmaq – bir cinayettir’’, – dep qayd etti öz çıqışında devletimizniñ Başlığı.

Şahsiy eviniñ üstüne ukrain bayrağını asqan qırımlı fermer Volodımır Baluh beş yılğa maküm etildi. Uydurılğan qabaatlavlar esasında yigirmi yıllıq apis ükümini alğan qırımlı rejissör Oleg Sentsov Rusiyeniñ şimalinde tüzetüv koloniyasında bulunmaqta’’, – dep hatırlattı Petro Poroşenko.

O qayd etti ki, qanunsız şekilde maküm etilgen ukrain vatanperverler ekisi de narazlıqlarını bildirip, açlıq ilân ettiler, onıñ içün şimdi ölüm ile ayat arasındalar. Prezident Rusiye apishanelerinde, Qırımda ve başqa işğal etilgen topraqlarda tutulğan Kreml mabuslarını azat etmek Ukrainanıñ teşebbüslerine qol tutqan dünya toplulığına öz minnetdarlığını bildirldi.

Prezident Petro Poroşenko Qırım işğalinden soñ Rusiyeniñ nevbetteki maqsadı Azaq deñizini işğal etüv olğanını bidirdi. Devletimizniñ Başlığı qanunsız bozuluvlarnı, bu cümleden, Keriç köpüriniñ qanusız qurucılığı neticesinde ukrain ve çetel gemiler içün Keriç boğazında halqara navigatsiya serbestliginiñ bozuluvını toqtatmağa çağırdı.

Aynı vaqıtta Prezident cinayetçini mesüliyetke çekmek qolay olmağanını qayd etti. ‘‘Emin etem ki, halqara cemiyet istilâcığa qarşı umumiy cebe olaraq qarşı çıqmasa, cezalav qaçılmaz olmasa, Moskova tecavüziy kenişleme siyasetinden öz-özünden iç bir vaqıt vazgeçmez’’, – dep qayd etti Prezident. Lâyıq cezalavnıñ yoqluğı Gürcistandan soñ Ukrainanıñ, Litvinenkodan soñ – Skripallerniñ, Allepodan soñ ise İdlibniñ nevbeti kelgenine ketirdi… Kremlniñ toqtamağa niyeti yoq. Qırım işğalinden soñ Rusiyeniñ nevbetteki maqsadı – Azaq deñizini işğal etmektir’’, – dep qayd etti Petro Poroşenko.

Devletimizniñ Başlığı qayd etti ki, Keriç boğazında qanunsız şekilde köpür qurğan Rusiye em ukrain, em de çetelden gemiler içün halqara navigatsiyanıñ serbestligini bozmağa başladı. ‘‘Böyle qanunsız qaba bozuluvlar BMT deñiz aq-uquqı Konventsiyası çerçivesinde toqtatılmalı. Olarğa keskin cevap berilmeli, bu cümleden, sanktsıyalar siyaseti ve bu maqsatlarğa hızmet etken başqa tedbirler de quvetleştirilmeli’’, – dep ayırca qayd etti Ukraina Prezidenti.