2018 senesi arman (avgust) ayı 15 künü fikir ve söz serbestligi aqqını temin etüv ve qorçalav boyunca BMT Mahsus maruzacısı David Kaye, beden ve ruh sağlığı aqqı boyunca BMT Mahsus maruzacısı Daynius Puras
, uquq qorçalayıcılar boyunca BMT Mahsus maruzacısı Mayk Forst Jenevada beraberlikte RF ükümetinden Oleg Sentsovnı deral ve iç bir şartsız azat etmege talap etip, onıñ fizikiy ve ruhiy vaziyetinen pek raatsızlanğanlarını bildirdiler. BMT ekspertleriniñ beyanatında qayd etilgenine köre, Oleg Sentsov rejisör ve Qırımnıñ Rusiye tarafından işğal etilüviniñ keskin teñqitçisi olaraq yaqalandı, ‘‘rusiye vatandaşı’’ olaraq maküm etildi ve 64 Ukraina vatandaşınıñ azatlıqtan marum etilüvine qarşı öz narazlığını bildirip, üç ay devamında açlıq tutmaqtadır. BMT ekspertleri RF ükümetinden Oleg Sentsovğa kerekli tıbbiy yadımnı bermege talap ettiler. ‘‘Sentsovnıñ ayatı qaçılmaz telüke altındadır. Onıñ açlığı halqara uquqnı bozğan qabaatlav qararınıñ ve maküm etilüviniñ neticesidir. Rusiye akimiyetinden onı iç bir şartsız azat etmege talap etemiz’’, – dep beyan etti RF akimiyeti ile bu mesele boyunca bağ tutqan ekspertler.