2018 senesi oraq ayı (iyül) 4 künü Ukraina Prezidentiniñ Qırım MC Daimiy Temsilcisi Borıs Babin ve onıñ Birinci muavini İzet Gdanov BMT İnsan aqları boyunca Yuqarı komissar idaresiniñ Ukrainadaki vekili Pablo Mateunıñ Herson vilâyetine ziyareti çerçivesinde Devlet Sıñır Hızmetiniñ Azaq-Qaradeñiz idaresi ve Devlet sıñır hızmetiniñ Herson vilâyetinde idaresi reberiyetiniñ, ‘‘Desâte kvitnâ’’ cemaat teşkilâtınıñ Herson ve Odesa şeerlerindeki ofis vekilleriniñ iştiragı ile iş muşaveresini keçirdiler. Muşavere devamında Qırımdan memleket içinde köçken şahıslarnıñ ve Qırımda yaşamağa devam etken Ukraina vatandaşlarnıñ bir sıra meseleleri, bu cümleden, pasportlarnı resmiyleştirüv ve KÇNN-dan keçüv muzakere etildi.
Bu munasebet ile Ukraina Devlet Sıñır Hızmetiniñ Herson vilâyetinde İdaresi müdiriniñ birinci muavini Yana Agapkina, Devlet Migratsiya Hızmeti regional bölükleriniñ keñişletilgen cedvelini ve ‘‘Dokument’’ Devlet müessisesiniñ 2018 senesi qural ay (mayıs) 30 künü açılğan yañı binasını diqqatqa alıp, toplaşuvda bulunğanlarnı 2017 ve 2018 seneleri içün statistik malümatlarınen tanıştırdı. Bu devlet müessiseniñ temsilcisi yañı ofisniñ açıluvından soñ 2018 senesi ilk yaz ayı devamında vaqtınca işğal etilgen Qırımdan bir biñden ziyade Ukraina vatandaşı yañı ofisniñ hızmetlerinen faydalanğanını bildirdi.
Devlet Migratsiya Hızmetiniñ vekilleri vaqtınca işğal etilgen yarımadağa yaqın olğan rayonlarda memuriy hızmet merkezleriniñ açıluvı oğrunda icra akimiyet ve öz-özüni idare etüv organlarnıñ faaliyetini yönetüvinde Temsilcilikniñ rölüne yüksek qıymet kestiler. Borıs Babin vaqtınca işğal etilgen Qırımdan kelip ketken vatandaşlarğa uquqiy yardım berüvni qolaylaştıruv kibi Temsilcilikniñ eñ muim vazifelerini qayd etti.
Pablo Mateu BMT İnsan aqları boyunca Yuqarı komissar idaresiniñ Ukrainada gumanitar vazifesini tarif etti ve memuriy hızmetlerni berüv esnasında qoşma teşkerüvler tecavüzciniñ bozucı areketleri sebebinden peyda olğanı içün, qırımlılarğa Ukrainanıñ nezareti altında bulunğan topraqlarda berilgen memuriy hızmetlerniñ keyfiyeti içün mesüliyetniñ büyük qısımı işğalci akimiyetiniñ boynuna yüklengeninen razı oldı. Daimiy Temsilci Borıs Babin 2018 senesi ilk yaz ayı (iyün) ayı 19 künü qabul etilgen Rusiye tecavüzine qarşılıq kösterüv boyunca acele tedbirler Planı, bu cümleden, parlamentke al-azırda taqdim etilgen qanun leyhaları çerçivesinde Temsilcilikniñ faaliyetindeki esas yönelişlerni qayd etti.
Körüşüvniñ neticesi olaraq, BMT İnsan aqları boyunca Yuqarı komissar idaresiniñ ve ‘‘Desâte kvitnâ’’ cemaat teşkilâtınıñ vekilleri ‘‘Dokument’’ Devlet müessisesiniñ yañı binasını ziyaret etip, vaqtınca işğal etilgen Qırımnıñ sakinlerine avropa seviyesinde hızmetler berilgenini öz közlerinen kördiler.
2018 senesi oraq 5 künü Daimiy Temsilci Borıs Babin BMT İnsan aqları boyunca Yuqarı komissar idaresiniñ vekili Pablo Mateu ve ‘‘Desâte kvitnâ’’ cemaat teşkilâtınıñ vekilleri ile beraber ‘‘Qalançaq’’, ‘‘Çaplınka’’ ve ‘‘Çongar’’ KÇNN-nı ziyaret etti. Ziyaret esnasında bir kere daa KÇNN-nı yarıq, saçaq, piyade yolları ceetten acele sürette abadanlaştırmaq kerek olğanı qayd etildi, BMT İnsan aqları boyunca Yuqarı komissar idaresi tarafından böyle meselelerge bundan evel berilgen yardım ve 2018 senesi ‘‘Qalançaq’’ ve ‘‘Çongar’’ KÇNN-niñ abadanlaştıruvı içün Ukraina Nazirler Şurasınıñ qoşma maaliyeniñ berilüvi boyunca qararınıñ yerine ketirilüvi muzakere etildi.
Ziyaret esnasında Pablo Mateu Novooleksiyivka qasabasındaki mektepte onıñ müdiri ve aynı vaqıtta Herson regional meclisiniñ reisi olğan Lenur Lümanov ile körüşti, Qırımda yaşağan balalarnı eksternat şekilinde oqutqan ve qırımtatar tilinde tasil bergen bu oquv yurtına BMT İnsan aqları boyunca Yuqarı komissar idaresi tarafından bir qaç ay evel berilgen bilgisayarlar taqdim etildi.
BMT İnsan aqları boyunca Yuqarı komissar idaresi vekiliniñ Herson vilâyetine ziyareti esnasında icra akimiyetniñ ve öz-özüni idare etüv organlarnıñ regional yolbaşçılarınen de körüşüvler planlaştırıldı.