Sentyabr 7 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov BMT sisteması çerçivesinde Ukrainada buhran başlanğanından berli gumanitar yardım bergen BMT Nufus fondunıñ temsilcileri ile körüşti.

Lyudmila Şevtsova ve Konstantin Boyçuk Birinci muavin ile vaqtınca işğal olunğan topraqlarnıñ sakinleri ve devlet icinde köçken şahıslar içün içtimaiy-ruhiy yardım taqımlarnıñ teşkil etilüvini muzakere ettiler.

Fondnıñ temsilcileri bu vazifeniniñ yerine ketirilüvinde peyda olabilecek meselelerni muzakere etip, Birinci muavinniñ mobil taqımlarnıñ Herson şeerinde, Geniçesk ve Qalançaq rayonlarında yerleşüvi aqqında teklifini diñlediler.

Bundan da ğayrı, İzet Gdanov işğal olunğan Qırımda yüz bergen insan aq-uquqlarınıñ bozuluvı ve Ukraina vatandaşlarına qarşı cezalavlarnıñ artqanı aqqında hatırlattı.

Taraflar añlaşqanına köre, BMT Nufus fondu Ukraina Prezidentiniñ Qırım MC Temsilciligine planlaştırılğan faaliyeti aqqında tolu analitik ve statistik malümatlarını taqdim etecek.