Strategik ve halqara araştırmalar merkezi (CSIS) britaniyalı tetqiqatçısı Ceyd MakGlinnniñ yolbaşçılığında “Bosağalarnı keçüv: Ukrainanıñ rusiye işğaline qarşılığı” adlı esabat neşir etti. Esabat işğalden qurtarılğan topraqlarda ukrain qarşılığınıñ müimligi köstere ve bir sıra intervyüğa, şu cümleden qarşılıq areketiniñ doğrudan iştirakçilerinen qonuşmalarğa esaslana.

Vesiqada Ukraina qarşılığı kontekstinde Qırımnıñ qoşqan issesi de ayrıca qayd etile:

Qarşılıq kösterüvniñ körümli tarafı Qırımnıñ iştirak etüvidir, çünki bu topraqlar yıllar devamında işğal altında bulunğanı içün zapt etilgen dep sayıla edi. Esabatlar, Qırımda çoq sayıda qadınlarnıñ qarşılıq areketine qoşulğanını köstere, bu ise olarnıñ işğalge qarşı turmağa istegenlerini köstere. Qadınlar da qarşılıq kösterüvniñ daa gizli şekillerinde müim rol oynaylar, meselâ, işğalcilerniñ yerli musafirçenlik faraziyesinden faydalanıp, rus askerleriniñ aş-suvlarını zeerlemme.

“ATEŞ” areketiniñ komandanlarından biri esabat içün bergen intervyüsında, areket iştirakçileri arasında em erkekler, em de qadınlar olğanını, çoqusı 40 yaşından küçük olğanını qayd etti. Onıñ sözlerine köre, faallerniñ episiniñ balası olmasa da, çoqusı evli.

Esabatta ukrain partizanlarınıñ strategik ğayretleri arbiy yük ve hırsızlanğan mallarnı, meselâ, boğday ve madenni taşuvı içün pek müim olğan demiryollarda diversiyalarğa baqtırılğanı aqqında aytıla.

Esabatta ukrain bölükleriniñ Qırımda diversiya keçirgenlerine baqmadan, qarşılıq kösterüvniñ başqa şekilleri de müim olmağa devam etkeni qayd etile. Müellif 2023 senesi dekabr ayında “Krımski boyovi çaykı” (“Qırımnıñ cenkâver çağalaları”) adlı ukrain partizan areketiniñ azaları, yaşayışlarını telüke altında qoyıp, 24 rus askeriniñ raqısına mışyak ve strihnin qarıştırıp, zeerlep öldürgenlerini misal ketire. Bundan da ğayrı, Bağçasaraydaki ukrain partizanları aşlar ve içkilerge mışyak ve sıçan zeerini qarıştırıp, rus askerlerini öldürgenleri aqqında da beyan etildi.

Ceyd MakGlinn Ukrainanıñ arbiy faaliyetinde partizanlarnıñ müim yer alğanını aydınlata: partizanlar istihbarat malümatı toplamada müim rol oynaylar, arbiy areketlerni destekleyler, duşmannıñ logistikasına ve komandanlıq noqtalarına qarşı diversiya keçireler, ukrain arbiy teşebbüsleri içün şarait yaratalar:

Qırımğa yapılğan ücümler büyük geopolitik emiyet taşıy ve putinnñ rus qudreti aqqında iddialarını dağıtıp, ukrain arbiy ruhunı pekite. Ket-kete ukrain qarşılıq areketi yerli halqnıñ “dostluğı” aqqında rus proğagandasınıñ añlatuvlarını yoq ete.