Seyitler rayonında tintüvler Qırım birdemliginiñ ve ”Grani.ru” matbuat vastasınıñ jurnalisti 34 yaşındaki Ayder Kadırovnıñ evinde keçirile. Tintüv esnasında evde ömür arqadaşı ve eñ kiçkenesi 2,5 aylıq olğan dört balası bulunmaqta. Taqiqat işlerini tanitqan işaretleri olmağan eki ”Gazel” arabasında kelgen şahıslar keçire. Qanunsız şekilde keçirilgen tintüvden soñ Ayder Kadırovnı Aqmescitteki Federal Havfsızlıq Hızmeti İdaresine alıp kettiler.

Sudaq civarındaki Qoz qasabasında tintüv 30 yaşındaki Ayder Ablâkimovnıñ evinde keçirile. Kiçkene balası bar, özü Fevqulâde vaziyetler hızmetinde çalışa. FHH tarafından yaqalandı.

İçki rayonında tintüv 29 yaşındaki Enver Topçınıñ evinde keçirilmekte. Evli, 18 yaşına kelmegen eki balası bar. FHH tarafından yaqalandı.

Sudaq şeerinde tintüv 29 yaşındaki faalci Kâzim oğlu Ridvan Umerovnıñ evinde keçirile. Evli, 18 yaşına kelmegen üç balası bar. Evi yanında al-azırda üç araba, olarnınñ arasında içinde OMON hadimleri oturğan ”avtozak” bulunmaqta. FHH tarafından yaqalandı.

”Yaş qırımtatarlarnıñ evlerinde keçirilgen tintüvler – işğalci akimiyetniñ nevbetteki cinayetidir. Medeniy dünyada yaşağan balalarnı sırf babaları grajdan jurnalistleri ve faalciler olğanı içün saba qapılarına qaqqan RF FHH ve silâlı adamlar uyantmay. Rusiye er bir oñaytsız adamdan terrorist yapmağa tırışa. Birdemlik ise onı er şeyden ziyade açuvlata. Tintüvler – Rusiyege boysunmağan qırımatar halqını taqip etüvnen bağlı olğan izçen cinayetlerniñ devam etmesidir”, – dep izaatlay Ukraina Prezidentiniñ Qırım MC Daimiy Temsilcisiniñ muavini Tamila Ravil qızı Taşeva.

Ukraina Prezidentiniñ Qırım MC Temsilciligi faal siyasiy mevamı olğan Ukraina vatandaşlarını taqip etken işğalci akimiyetniñ areketlerini takbih ete, er bir adiseni cedvelge ala ve siyasiy sebeplerden taqip etüvge dair malümatlarnı Rusiye Federatsiyasınıñ vaqtınca işğal etilgen Qırım yarımadasındaki cinayetleri cedveline qoşa.