İsviçre Elçihanesiniñ ve İsviçre Federal çetel işler departamentiniñ temsilcileri Ukrainanıñ topraq bütünligine deñişmegen alda qol tutqanlarını ve Qırımnı ilhaq etüv teşebbüsini tanımağanlarını bir kere daa qayd ettiler. Bundan ğayrı olar tınçlıq ve havfsızlıq oğrunda işbirlik ve fikirdeşliklerini devam ettireceklerinde işandırdılar.

Tedbir esnasında Anton Korınevıç adet üzre Qırım Platforması Ofisiniñ faaliyetini taqdim etip, onıñ Temsilcilikniñ terkibinde ayrı bir bölük olaraq çalışıp, Ukraina devlet akimiyet organlarını, ecnebiy devletlerni, halqara teşkilâtlarnı ve Qırımda yaşağan Ukraina vatandaşlarını birleştirüv ve aralarında bağ tutuv içün daimiy sürette hızmet etecek bir meydançıq olacağını bildirdi.

Aynı vaqıtta diplomatlarğa Ukraina-Helsinki birliginiñ qol tutuvı ile İnsan aqları oğrundaki media teşebbüsi tarafından amelge keçirilgen leyha – aq qorçalayıcı, ”Qırım birdemligi” birleşmesiniñ faali Mumine Saliyevanıñ qanunsız alda apis etilgen Qırım sakinleriniñ balalarına, babalarınıñ apis etilüvinden soñ dünyağa kelgen qızçıq ve oğlançıqlarğa bağışlanğan ”Apis etüvden soñ doğğanlar” fotoleyhası taqdim etildi.

Bundan ğayrı, Anton Korınevıç itibarlı musafirlerge Qırım platformasınıñ ilk nevbetteki vazifelerini ve olarnıñ arasında Ukraina milliy hatıra institutı ile beraberlikte teşkil etilgen Rusiye istilâsı virtual müzeyini, vaqtınca işğal etilgen topraqlarda yaşağan balalar içün onlayn-platformanı taqdim etti.
Qırım Platforması Ofisine, Qırım Muhtar Cumhuriyeti ile Aqyar şeerini işğalden azat etüv, Qırımnıñ vaqtınca işğal etilmesi neticesinde zarar körgen Ukraina vatandaşlarınıñ aq-uquqlarını ve serbestliklerini qorçalav meselelerine diqqat ayırğan ve Ukrainanıñ topraq bütünligine ve egemenligine deñişmegen alda qol tutqan itibarlı musafirlerimizge minnetdarlığımıznı bildiremiz.

@Embassy of Switzerland in Ukraine / İsviçreniñ Ukrainadaki Elçihanesi