Brifingde Ukraina çetel işler Naziriniñ birinci muavini Emine Caparova, ”QırımSOS” CB idare başlığınıñ muavini Olga Kurışko, Qırım MC ve Aqyar şeeri prokuraturasınıñ idare başlığı da iştirak ettiler.

Brifing esnasında aşağıdaki mevzular muzakere etildi:

– Qırımda zorbalıqnen ğayıp oluv adiseleriniñ taqiq etilmesi ve olarğa alâqası olğan şahıslarnıñ mesüliyetke çekilmesi içün Ukraina tarafından neler yapıla?
– İşbu cinayetlerniñ taqiq etilmesini tezleştirmek içün işğalci akimiyetke ne dayın basqı yapıla bile?
– Ukraina zorbalıqnen ğayıp oluv qurbanlarınıñ qorantalarına nasıl yardım ete?
– Vaqtınca işğal etilgen topraqlarda zorbalıqnen ğayıp oluv adiselerini cedvelge aluvda ve taqiq etüvde cemaat teşkilâtları nasıl vazife becermekte?

”15 zorbalıqnen ğayıp etilgen ömür” – ale daa ne tirisi, ne de ölüsi tapılğan insanlarnıñ süretleri ve ayat ikâyeleri. Qırımda zorbalıqnen ğayıp oluvlarnıñ qurbanları işğalci akimiyetke boysunmağan ukrain ve qırımtatar faalleri, ya da olarnı beklemege devam etken soy-sopları oldı.
Olar, Valeriy Vaşçuk, İvan Bondarets, Vasıl Çernış, Tımur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Kostenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbrayimov ve Ervin İbragimovdır.

Umumen alğanda, 2014 senesinden berli işğal etilgen Qırımda 44 kişi zorbalıqnen ğayıp oldı. Keççe altısınıñ ölüsi tapıldı, 19 kişi azat etildi, 3 kişi üküm ettildi, bir kişini ise işğalciler sürgün etti.

Temsilcilik vaqtınca işğal etilgen Qırım Muhtar Cumhuriyeti ve Aqyar şeeri topraqlarında Rusiye Federatsiyasınıñ işğalci akimiyeti tarafından işlengen cinayetlerniñ qurbanları aqqında hatırlatqan teşkilâtçılarğa teşekkür etip, ğayıp olğanlarnıñ qorantalarına qol tutuvını bildire. Aqiqatnı ille de ögrenirmiz, cinayetlerde qabaatlı olğanlar ise lâyıq cezalavğa oğratılır!