Ukraina televizion ve radio yayınlav meseleleri boynca Ukraina Milliy şurasınıñ malümatlarına köre, Qırım yarımadası işğal etilgen soñ, 31 ukrain teleradioşirket analog teleyayınlav aqqını ve daa 28 teleradioşirket dijital yayınlav aqqını ğayıp etti.
Bundan ğayrı, vaqtınca işğal etilgen Qırım Muhtar Cumhuriyeti ve Aqyar şeeri topraqlarında Rusiye Fedaratsıyasına boysunğan işğalci memuriyet yarımadada 39 Ukraina teleradioşirketniñ yayınlavlarını qanunsız şekilde toqtattı.
2014 senesinden başlap, vaqtınca işğal etilgen Qırım yarımadasında televizion ve alaqa vastaları 500 yaqın ukrain sıqlığını işletken Rusiye Fedaratsıyası ve onıñ işğalci memuriyetiniñ tolu nezareti altında buluna.
Bunınen beraber, jurnalistlerniñ aqlarını muntazam şekilde bozuv: yaqalavlar, insaniyetsiz davranuv, qıynav, uydurılğan qabaatlavlar esasında maküm etüv, vaqtınca işğal etilgen Qırım Muhtar Cumhuriyeti ve Aqyar şeeri topraqlarından mustaqil ve ihtisaslı matbuat vastalarını quvmaq maqsadınen işğalci akimiyet tarafından işletilgen vastalardan biridir. Al-azırda vaqtınca işğal etilgen ukrain topraqlarında mustaqil jurnalistika qalmadı.
2021 senesi saban ayınıñ 9-da Aqmescit şeerinde Taras Şevçenkonıñ doğğan künü munasebetinen keçirilgen tedbirlerni ziyaret etken ve ertesi kün – saban ayınıñ 10-da işğalci akmiyetiniñ vekilleri tarafından yaqalanğan Vladıslav Yesıpenkonıñ davası buña açıq-aydın misaldir. O, qanunsız şekilde ateşli silâni, onıñ esas parçalarını istisal etüv, yañıdan yapuv ya da tamir etüvde ve patronlarını istisal etüvde ve Qırımda ”Ukraina mahsus hızmetleriniñ menfaatlarına çalışıp, istihbarat-zarar ketirici faaliyetnen oğraşqanında” qabaatlandı.
Abulqatı vastasınen tevqifhaneden yollanılğan mektüpte Vladıslav Yesipenko muntazam sürette köteklenip qıynalğanını, böyleliknen işğalci akimiyet ondan işlemegen cinayetlerde özüni qabaatlı tanımasını istegenini añlatqan edi.
Vaqtınca işğal etilgen topraqlarda biñlernen Ukraina vatandaşları jurnalist faaliyetini alıp barğanları ve söz serbetligini numayış etkenleri içün taqip etildi.
Onıñ içün Ukraina Radio, televizion ve alâqa hadimleriniñ kününde Rusiye Fedaratsıyasınıñ ve vaqtınca işğal etilgen Ukraina topraqlarında onı temsil etken işğalci akmiyetniñ faaliyetinden zarar körgen ve vaqtınca işğal etilgen Qırım yarımadasında ukrain haber saasi içün küreşmege devam etken vatandaşlarımızğa qol tutmağa çağıramız.
Eminmiz ki, Qırımda kene ukrain radiosı, televizionı, alâqa vastaları, serbest jurnalistika ve obyektiv haberlerge irişüv ille de ğayrıdan tiklenecektir.