Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç, onıñ muavini Tamila Taşeva ve Ukraina çetel işler Nazirligindeki siyasiy direktoratnıñ hadimleri BM İnsan aqları boyunca nezaret etici missiyasınıñ Başlığı Matilda Bogner ve missiyanıñ hadimi Maksım Popovıç ile körüştiler.

Körüşüv çerçivesinde Daimiy Temsilci Anton Korınevıç Qırım Platforması Ofisiniñ faaliyetini taqdim etip, onıñ Ukraina Prezidentiniñ Qırım Muhtar Cumhuriyetindeki Temsilciliginiñ terkibinde ayrı bir bölük olaraq çalışıp, Ukraina devlet akimiyet organlarını, ecnebiy devletlerni, halqara teşkilâtlarnı ve Qırımda yaşağan Ukraina vatandaşlarını birleştirüv ve aralarında bağ tutuv içün daimiy sürette hızmet etecek bir meydançıq olacağını bildirdi. Bundan ğayrı, vaqtınca işğal etilgen Qırımda qanunsız şekilde yaqalanğan Ukraina vatandaşlarını, şu cümleden keçenlerde yaqalanğan Nariman Celâlov, Aziz ve Asan Ahtemovlarnı qorçalav meselesi muzakere etildi.

Anton Korınevıç, Qırım platformasınıñ içki treki çerçivesinde Qırım Platforması Ofisi Kıyiv şeerinde «Qırım habı» vazifesini becerip, avuştırılğan çeşit türlü Qırım akimiyet organlarınıñ, Ekspertler ağı azalarınıñ ğayretlerini birleştirüv, beraberlikte vatandaşlarnı qabul etüv, yerli ve halqara ekspertlerniñ iştiragi ile Qırımnı işğalden azat etüv ve ğayrıdan integratsiya etüvge bağışlanğan tedbirlerni keçirüv içün hızmet etecegini qayd etti.

Malümat toplağan ve er yıl Qırım Muhtar Cumhuriyetinde ve Aqyar şeerinde insan aqları saasındaki vaziyetke dair BM Baş kâtibiniñ maruzasını azırlağan, Qırım Platforması Ofisine ve vaqtınca Qırım işğali sebebinden zarar kögen Ukraina vatandaşlarınıñ aq-uquqlarını ve serbestliklerini qorçalav meselesine diqat ayırğan Missiyağa minnetdarlığımıznı bildiremiz.