Herson vilâyeti devlet memuriyetiniñ reisi Sergiy Kozır ile körüşüvinden soñ İsviçre elçisi Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıçnıñ daveti üzerine Herson vilâyeti ve Qırım Muhtar Cumhuriyeti arasındaki memuriy sıñırda yerleşken ”Qalançaq” ve ”Çaplınka” kiriş-çıqış nezaret etüv noqtalarını ziyaret etti, memleket içinde Qırımdan Hersonğa avuşqan şahıslar, silâlı dava ve Qırım meselelerinen oğraşqan devlet organlarınıñ hadimleri ve cemaat teşkilâtlarınıñ vekilleri ile körüşti.

İsviçreniñ Ukrainadaki Fevqulâde ve Vekâletli elçisi ile beraber memuriy sıñırnı ziyaret etip, Büyük Britaniyanıñ Ukrainadaki vekillerinden Şivon Rayt ve çatışma meseleleri boyunca mesleatçı Dominik Haydn-Brasvayt Qırım sakinleri ile körüştiler.

Bundan ğayrı, ilk yaz ayınıñ 10-da Klod Vild Arabat belinde keçirilecek ”Cenübiy inkişaf strategiyası” I-nci halqara yatırımcılar forumında iştirak etecektir.

Ukrainanıñ topraq bütünligine ve egemligine qol tutqan İsviçreniñ Ukrainadaki Fevqulâde ve Vekâletli elçisine öz minnetdarlığımıznı bildiremiz.