Ukraina Prezidentiniñ Qırım Muhtar Cumhuriyetindeki Temsilciligi studentlerni ve abituriyentlerni özüni etraf müitten ayruvdan azat etken Ükümet qararını alğışlay. Bu sene Ukraina Prezidentiniñ teşebbüsi ile vaqtınca işğal etilgen topraqlarda yaşağan balalar içün Ukrainanıñ eñ yahşı aliy oquv yurtlarına kirüv imkânlar epeyi kenişletildi. Böyle areketler işğalde yaşağan vatandaşlarımıznen alâqalarımıznı qorçalay, olarğa açıq olğanımıznı ve gençlerimizni qorçalap, qayğırmağa azır olğanımıznı köstere. Ukraina aliy oquv yurtlarına kirüv balalar içün kelecek fırsatlarını Ukrainada saylamağa, memleketniñ sıñırlarından tış tanılğan diplomnı almağa, dünyanıñ eñ yahşı aliy oquv yurtlarınıñ almaşuv leyhalarında ve magister programmalarında iştirak etmege, staj yapmağa ve Avropağa vizasız seyahatlar yapmağa imkânlar yarata. Bundan ğayrı, karantin tedbirler ve Rusiye Federatsiyasınıñ işğalci akimiyeti tarafından KÇNN keçüvnen bağlı sıñırlamalar sebebinden Qırımdan kelgen balalar içün kiriş kampaniyası ekim (oktâbr) 23 kününece uzatıldı. Ve biz mında propagandasız oqup tasil almağa istegen er kesni bekleymiz, – dep izaatlay Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç.
Arman (avgust) ayı 8 künü itibarınen, 2020 senesi vaqtınca işğal etilgen Qırımdan 378 Ukraina vatandaşı (2019 senesi – 265 kişi) ve vaqtınca işğal etilgen Donetsk ile Lugansk vilâyetlerinden 1671 bala (2019 senesi ise 1600 kişi) Ukraina aliy oquv yurtlarınıñ studentleri oldı.
Diqqatıñıznı şuña celp etemiz ki, vaqtınca işğal etilgen topraqlarda yaşağan abituriyentler qolaylaştırılğan usulnen vesiqalarını 2020 senesi ekim ayı 23 kününece tapşıra bileler. Onıñ içün vaqıt qaçırmadan bu imkâniyet aqqında öz dostlarıñızğa ve yaqınlarıñızğa haber etiñiz! Oquvğa kiriş aqqında tafsilâtlı malümatnı bu saifede oqumağa mümkün: https://www.vstup-prosto.com/
Ukrainanıñ vaqtınca işğal etilgen topraqlarını ğayrıdan integratsiya etüv meseleleri boyunca Nazirlik haber etkenine köre, Ükümet aşagıdaki şahsıslardan özüni etraf müitten ayrmağa talap etmemege qarar etti:
- devlet akimiyeti organları öz vekâletlerini tolu şekilde yerine ketirgen topraqlarda bulunğan aliy oquv yurtlarına kirmege niyetlengenler;
- devlet akimiyeti organları öz vekâletlerini tolu şekilde yerine ketirgen topraqlarda bulunğan aliy oquv yurtlarına qabul etilgenler;
- devlet akimiyeti organları öz vekâletlerini tolu şekilde yerine ketirgen topraqlarda bulunğan aliy oquv yurtlarında al-azırda oquğanlar;
- devlet akimiyeti organları öz vekâletlerini tolu şekilde yerine ketirgen topraqlarda bulunğan aliy oquv yurtlarına yuqarıda qayd etilgen şahısnı ozğarğan anası ya da babası (analıq ya da babalıq yapqan birisi), vasiy, müteveli ya da bir de bir başqa qanuniy temsilcisi.