Körüşüv esnasında Qırımnı işğalden azat etüv boyunca Halqara platformanı teşkil etüvniñ müimligi meselesi muzakere etildi. Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç qayd etkeni kibi, bu ceryannıñ lideri Ukraina Çetel işler Nazirligi / MFA of Ukraine olmalıdır. Devlet akimiyeti organları em Ukrainada, em çetelde areketlerni uyğunlaştırmaq maqsadınen Qırım yarımadasını işğalden azat etüv strategiyasını azırlamaqtalar.
Büyük Britaniyanıñ Ukrainada Fevqulâde ve Tolu Vekâletli Elçisi Melinda Simmons ile, 2014 senesi saban (mart) ayında BM Baş assambleyasınıñ Rezölütsiyasında qayd etilgen tanımama siyasetine riayet etüv meselesi, sanktsiyalar siyaseti, insan aqlarınıñ bozuluvı meselesi, işğalci ”organlar” tarafından areket serbestliginiñ sıñırlanması, mülkiyet aqlarınıñ bozulması, Ukrain kilisesine qarşı basqı ve vaqtınca işğal etilgen Qırım topraqlarında tamır qırımtatar halqınıñ aq-uquqlarını bozuv meseleleri muzakere etildi.
Ukraina Prezidentiniñ Qırım Muhtar Cumhuriyetindeki Temsilciligi Rusiye Federatsiyası tarafından Qırım Muhtar Cumhuriyetini ve Aqyar şeerini ilhaq etüv teşebbüsini tanımağan ve vaqtınca işğal etilgen topraqlarda Ukrainanıñ topraq bütünligini ve egemenligini ğayrıdan tiklev oğrunda ğayretlerini birleştirgen ortaqlarına öz minnetdarlığını bildire.