Bügün Ukraina Yuqari Şurasında vaqtınca işğal etilgen Qırım Muhtar Cumhuriyetinde ve Aqyar şeerinde ölüm ve doğuv adiselerini qayd etüvge dair memuriy ceryanınıñ başlatılması maqsadınen 3713 ve 3714 sanlı qanun leyhaları qayd etildi.
Ukraina Prezidentiniñ Qırım MC-deki Temsilciligi semereli işbirlik yapqan insan aqları boyunca Yuqarı Şurası Komitetine ve metinge qol tutqan Ukraina halq deputatları Dmıtro Lubinets, Rustem Umerov, Kostântın Kasay, Taras Tarasenko, Nelli Yakovleva, Ruslan Gorbenko, Oleksiy Kuznetsov, Ahtem Çıygoz, Oleksandr Kopılenko, Sergiy Mandziyge öz minnetdarlığını bildire. Ukrainanıñ vaqtınca işğal etilgen topraqlarını ğayrıdan integratsiya meseleleri boyunca Nazirlikke ve umumiy teşebbüs üzerinde çalışuvğa qoşulğan aq qorçalayıcı teşkilâtlarğa, qanun deñişmelerine qol tutqan ve qabul etilgen soñ memuriy ceryannıñ amelge keçirilüvi üzerinde çalısqan Ukraina adliye Nazirligine ayrıca münnetdarlıq bildirile.
”Doğuv adiseleriniñ qayd etilüvi içün memuriy ceryannı başlatuv – Ukraina akimiyetiniñ işğalde yasağan adamlarğa taba çoq beklenilgen adımı ve Rusiyeniñ Qırım topraqlarındaki kolonial siyasetine qarşılıq kösterüvdir. Bügünde-bügün mecburiy şekilde öz pasportlarını aldırtqan Moskova yarımada ealisiniñ terkibini ve milliy mensübiyetini deñiştirmekte. Aynı vaqıtta yarımadağa eñ azından bir qaç yüz bin Rusiye vatandaşı, ilk nevbette qorantalarınen beraber arbiyler, uquq qorçalav organlarnıñ hadimleri ve memurlar köçürilgeni sebebinden, işğalci akimiyetke qol tutqanlarnıñ saysı arttı. Bu sebepten er bir bir Ukraina vatandaşınıñ ukrain vesiqalarına irişe bilmesi ve öz devleti ile bağnı üzmemesi, kelecekte içtimaiy ve memuriy hızmetler, vizasız seyahatlar yapmaq imkâniyeti, çetelge seyahatlar yapmaq içün biometrik pasportnı resmiyleştirüv, ukrain tasiline irişim kibi qoltutuvnı alması içün er türlü ğayretler köstermelimiz”, – dep izaatlay işbu qanun leyhasınıñ müimligini Ukraina Prezidentiniñ Qırım MC-deki Daimiy Temsilcisiniñ Birinci muavini Darya Svırıdova.
Ukraina Prezidentiniñ Qırım MC-deki Temsilciligi, qanun leyhası Yuqarı şurasında tez vaqıtta baqılacağına ve metini çeşit türlü fırqalarında azalıq yapqan deputatlar tarafından qol tutulacağına ümüt ete, çünki işğalde yaşağan Ukraina vatandaşlarına qol tutuv ve devletniñ topraq bütünligini ğayrıdan tiklev, devlet seviyesinde alınğan qararlarğa tesir etken vatandaşlarımıznıñ boyun borcudır.