Esirler ve olarnıñ qorantaları, tedaviylevge paralarınıñ yetmemezlikten başlap, abulqatlarnıñ faaliyeti içün tölemege imkânları olmağanına qadar büyük içtimaiy-turmuş problemalarğa oğray.

Bundan ğayrı, em esirler, em de olarnıñ qorantaları tibbiy yardımğa ve psihologik reabilitatsiyağa muhtaclar.

Yuqarı Şurağa Ukraina Prezidenti Volodımır Zelenskıy tarafından taqdim etilgen qanun leyhaları, çoqtan berli beklenilgen bir adım olıp, işbu şahıslarnıñ içtimaiy ve uquqiy qorçalanmasını maqsat etip qoyğandır.

Brifing iştirakçileri tafsilâtlı şekilde böyle qanun leyhalarınıñ müimligini izaatladılar.

Hususan Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç şunı qayd etken edi:

«Bu müimden-müim qanun leyhaları ”Qırım platforması paketine” kirmekteler. Olarnıñ metini üzerinde Ukraina Prezidentiniñ Qırım Muhtar Cumhuriyetindeki Temsilciligi, Ukraina Prezidenti Ofisi, Vaqtınca işğal etilgen Ukraina topraqlarını ğayrıdan integratsiya etüv meseleleri boyunca Nazirlik, yetekçi aq qorçalayıcı teşkilâtlar ve, eñ müimi, esirlerniñ aqrabaları tarafından meydanğa ketirilgen teşkilâtlar çalıştı.

Bu qanun leyhası devlet organları ve cemiyet ğayretleriniñ birleştirilüvine güzel bir misaldir. Ukraina Prezidenti Volodımır Zelenskıy bu qanun leyhasını Ukraina Yuqarı Şurasına taqdim etip, acele olğanını qayd etti. Ukraina halq deputatlarını bu çoqtan berli beklenilgen ve Ukrainağa qarşı silâlı istilâ sebebinden şahsiy serbestliklerinden marum etilgen şahıslarnıñ ve olarnıñ qoranta azalarınıñ içtimaiy ve uquqiy qorçalanması meselesini çezgen qanun leyhasına qol tutmağa çağıramız».

Qanun leyhasına qol tutqan aq qorçalayıcılarnıñ umumiy beyanatınen tanış oluñız: https://cutt.ly/NRhP2ZT

#QırımUkrainadır #UkrainaPrezidentiniñQırımMCTemsilcilgi #QırımPlatforması #CrimeaPlatform #Ukraina #Ukraine #Qırım #Crime