Sentyabr 29 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin, Kiyevde Büyük Britaniya elçihanesinde Siyaset, iqtisat ve cemaat ile alâqa bölüginiñ yolbaşçısı Rebekka Lohna ve Siyaset, iqtisat ve cemaat ile alâqa bölüginde programma koordinatorı vazifesini becergen Svitlana Yavorska ile körüşti.

Körüşmede Ukraina Prezidentiniñ Qırım Muhtar Cumhuriyetindeki Daimiy Temsilcisiniñ birinci muavini İzet Gdanov, Herson vilâyetinde Qırımtatar Milliy Meclis temsilcisi Abmecit Suleymanov, Herson şeeri Qırımtatar Meclisiniñ reisi İbragim Suleymanov, Qırımtatar resurs merkeziniñ temsilcisi Emir Bekirov, “Qırım tamır halqlarına qoş tutuv ve araştırmalar fondu” halqara cemaat teşkilâtınıñ başlığı Elzara Topalova ve Herson vilâyeti devlet memuriyetiniñ reis mesleatçısı Alme Emirsale de iştirak ettiler.

Körüşme devamında Boris Babin elçihane temsilcilerini Ukraina Prezidentiniñ Qırım Muhtar Cumhuriyetindeki Daimiy Temsilciliginiñ kündelik faaliyetinen tanıştırdı ve idareniñ baş vazifelerini, hususan vaqtınca işğal olunğan topraqlarda yaşağan Ukraina vatandaşlarınıñ ve devlet içinde köçkenken şahıslarnıñ aq-uquqlarını qorçalavınen bağlı meselelerni belgiledi.

Bundan da ğayrı, taraflar vaqtınca işğal etligen Qırım yarımadasınıñ sıñırlarına yaqın yerleşken Herson vilâyetiniñ rayonlarında infrastruktura inkişafınen bağlı meselelerni muzakere ettiler.

Ukraina Prezidentiniñ Qırım Muhtar Cumhuriyetindeki Daimiy Temsilcisi vaqtınca işğal olunğan toparqlarınıñ sakinlerine memuriy hızmet berecek merkezlerniñ açıluvı ve Qırımnen memuriy sıñırda yerleşken «Çonğar» ve «Qalançaq» kiriş-çıqış nezaret noqtalarınıñ abadanlaştıruvınen bağlı olğan ve acele sürette çezilecek meselelerni qayd etti.