2019 senesi çiçek (aprel) ayı 10 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov Çehiya Cumhuriyeti Parlamentiniñ deputatları Odasınındaki çetel işler Komitetiniñ deputatlarından ibaret olğan eyet ve Komitet Başlığı Lubomir Zaoralek ile Ukrainada Çehiya Cumhuriyetiniñ Müteşem ve Tolu Vekâletli Elçisi Radek Matula ile körüşti.
Eyetni qabul etken İzet Gdanov Çehiya Cumhuriyeti Ukrainanıñ topraq bütünligine izçen şekilde qol tutqanı, Çehiya Cumhuriyetiniñ Ukrainadaki Elçihanesi memuriy hızmet merkezleriniñ donatıluvına halqara tehnikiy yardım bergeni içün öz minnetdarlığını bildirdi.
Devletlerimizniñ arasındaki tışqı-siyasiy munasebetlerini muzakere etüv esnasında Birinci muavin körüşüvde bulunğanlarnı Temsilcilikniñ faaliyeti ile tanıştırdı, eyet azalarına Ukrainanıñ vaqtınca işğal etilgen Qırım toprağını ziyaret etmege istegen yabancılar içün mahsus qanuniy tertip mevcut olğanını bildirdi ve vaqtınca işğal etilgen topraqlar ile iç bir memleket iqtisadiy munasebetlerde bulunamaycağına diqqat etti.
Vaqtınca işğal etilgen yarımadada yaşağan Ukraina vatandaşlarınıñ esas aq-uquqları bozulğanına, qırımtatarlar, etnik ukrainler qanunsız şekilde taqip etilgenine, qorqutılğanına, gibrid şekilde sürgün etilgenine, Qırım sakinleri qanunsız alda RF silâlı quvetlerine hızmetke çağırılğanına, Rusiye vatandaşları vaqtınca işğal etilgen Qırımğa köçürilgenine diqqat etildi.
Taraflar yarımada muntazam şekilde silâlandırılğanını, Qırım RF arbiy bazasına çevirilgenini, işğalciler yarımadanıñ suv ve biologik resurslarını, ösümlik ve ayvanlar dünyasını yoq etkenini muzakere etip, takbih ettiler.
İzet Gdanov printsipial şekilde Avropa-Atlantık integratsiyasınıñ esas yönelişinde areket etmege ve vaqtınca işğal etilgen Qırımnı eñ yaqın vaqıtta azat etmek içün rusiye istilâcısına siyasiy-diplomatik basqını quvetleştirmege kerek olğanını qayd etti.
Lubomir Zaoralek öz nevbette Çehiya Cumhuriyeti Parlamentiniñ esas qısımı muntazam şekilde Qırımnıñ qanunsız alda işğal etilüvi meselesinde fikirlerini deñiştirmegenini ve Rusiye Federatsiyasınıñ böyle areketleri Avropada halqara tertip içün telüke doğurğanını qayd etti. Çehiya Cumhuriyetiniñ Ukrainadaki Elçisi Radek Matula Elçihane tarafından berilgen gumanitar-uquqiy qol tutuvnıñ esas yönelişleri ve vaqtınca işğal etilgen Qırım MC yaşağan Ukraina vatandaşlarını qol tutmaq maqsadınen inkişaf etilgen yañı leyha imkânları aqqında haber etti.
Körüşüvniñ soñunda taraflar qarşılıqlı ürmet bildirdiler, bir-birine semereli körüşüv içün minnetdarlıqlarını bildirdiler ve kelecekte işbirlik aqqında añlaştılar.