Oktyabr 4 künü 2017 senesi Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin ve onıñ Birinci muavini İzet Gdanov, «Naftogaz Ukrainı» milliy aktsioner şirketi, «Çernomornaftogaz» halq öğündeki aktsioner cemiyetiniñ eyyetleri ile beraberlikte Strilkove qaz menbasınıñ istisal obyektlerini – Arabat beli yanında (Herson vilâyetiniñ Geniçesk rayonı) yerleşken МСП-112 (Deñizdeki daimiy platforma) gaz çıqarıcı platformasını ziyaret etip, Strilkove qaz menbasınıñ şimdiki alı, 2017/2018 küz-qış mevsimine azırlığı ve Geniçesk şeeri ve rayonı boyunca istimalcılarnı daimiy şekilde gaz ile teminatına bağışlanğan muşaverede iştirak ettiler.

Obyektlerni közetüvleri neticesinde Daimiy Temsilci, «Naftogaz Ukrainı» milliy aktsioner şirketi, «Çernomornaftogaz» halq öğündeki aktsioner cemiyetiniñ reberiyeti Herson vilâyetindeki icra akimiyetiniñ ve yerli öz-özüni idare etüv  teşkilâtlarınıñ ihtisaslı temsilcilernen vaqtınca işğal etilgilgen topraqlarınıñ sıñırına yaqın olğan rayonlarnıñ energetik hafsızlığına bağışlanğan keñeşte iştirak ettiler. Keñeş devamında kene de Arabat belinde Ukraina Milliy gvardiya şübesiniñ acele şekilde yerleşmesi ve Milliy polisniñ rayon şübeleriniñ yeterli derecede teminatınıñ kerekligi qayd etildi.

Bunınen beraber, Devlet sıñır hızmeti şübesiniñ Qırım işğali sebebinden Arabat belinde mecburiy bulunması işbu yerlerde hocalıq faaliyetine, bu cümleden, «Çernomornaftogaz» halq öğündeki aktsioner cemiyetiniñ işine keder etmegeni qayd etildi.

Keñeşte, «Çernomornaftogaz» halq öğündeki aktsioner cemiyetine hızmet etken gemilerniñ Geniçesk limanında yerleşüvi maqsadınen terenleştirme işlerniñ yapılmasına ve demiryol ağının bozuluvını toqtatılmasına kene de qol tutuldı.

Keñeş azaları vaqtınca işğal olunğan topraqlarda yerleşken depolarda cıqarılğan gaznı tutmaq imkânsız olğanı içün, küz-qış  mevsiminde qoşma olaraq gaznı borularda vaqtınca tutulmasını, yazda ise artqaç şingen gaznı arabalar vastasınen  ıqarılmasını teklif ettiler. Bu tedbirler Geniçesk rayonı Ukrainanıñ gaz taşıma ağına qoşulğance, yani vaqtınca olacağı qayd etildi, kerekli gaz taşıma ağlarını proyektleme meselesi muzakere etildi. Vaqtınca işğal etilgen Qırımğa ketken qapalı  gaz borusınıñ donatıluvı (mahsus qaplanması) da muzakere etildi.

Bundan da ğayrı, Ukraina Devlet sıñır hızmetiniñ Arabat belindeki daimiy hızmet noqtasi teşkerildi.

İzet Gdanov, Ukraina havfsızlıq hızmeti ve Ukraina naqliyat hızmeti ile beraberlikte «Qalançaq» kiriş-çıqış nezaret noqtasını ziyaret etip, administrativ sıñırıdan keçken qanunsız yolcu taşımalarına bir kere daa şaat oldılar. Em de «yol kirasını» yolcular Ukraina nezaretinden vaqtınca çıqarılğan Qırımda töleyler, yani Ukraina nezaretinden vaqtınca ıqarılğan
topraqnen administrativ sıñırdan doğrudandoğru transport alâqası keçmekte.