2018 senesi berim (sentâbr) ayı 17 künü Ukraina Prezidentiniñ Qırım MC Daimiy Temsilcisi Borıs Babin Lehistannıñ Varşava şeerinde er sene keçirilip, insaniyetlik ölçevinde mecburiyetlerni yerine ketirüvge bağışlanğan AHİT Muşaveresiniñ ‘‘Esas serbestlikler’’

Keñeşinde çıqışta bulundı. Daimiy Temsilci öz çıqışında Qırımda RF işğalci akimiyeti tarafından birleşüvler ve toplaşuvlar, areket ve söz serbestligi sıñırlavınıñ esas yönelişlerini ve eñ belli misallerini tarif etti, Qırım sakinleriniñ aq-uquqlarını qorçalavda cemaat teşkilâtlarınıñ ve uquq qorçalayıcılarnıñ röllerini aydınlattı. Başqa meselelernen beraber, qırımtatar halqınıñ öz-özüni idare etüv tertibatınıñ yasaq etilüvi, rusiye mahsus hızmetleri tarafından Qırultayğa umumhalq toplaşuv olaraq degil de, diniy teşkilât olaraq sahte saylavlarnı keçirmek ıntıluvlar, qırımtatar halqına qarşı ayrımcılıqnı toqtatmaq maqsadınen keçirilgen bir kişilik piketlerniñ iştirakçilerini taqip etüv, ‘‘Qırım birdemligi’’ areketini taqip etüv, Qırım ile memuriy sıñırda rusiye silâlı uquq qorçalav hızmetleri tarafından Ukraina vatandaşlarına qarşı qaparçılıq, qorqutuv ve taqip etüv aqqında malümat berildi.

Vahşıy hocalıq faaliyeti, Qırımnı arbiyleştirüv ve yarımadanıñ şimalinde ekologik buhrannı meydanğa ketirüv şaraitlerinde Qırımda mustaqil matbuat vastalar ve cemaat teşkilâtlar yoqluğınıñ menfiy aqibetine ayrıca diqqat çekildi.

Rusiyeleler tarafından ukrain reinelerini yaqalav ve taqip etüv, siyasiy mabuslarnıñ aq-uquqlarını sıñırlav şaraitlerinde Rusiye insan aqları boyunca vekâletlisi faaliyetiniñ qaba şekilde siyasiyleştirüvniñ menfiy tesiri aqqında bildirildi.

Qara ve Azaq deñizleriniñ suvlarında ukrainalı balıqçılarnıñ ve deñizcilerniñ menfaatlarına telüke doğurğan RF-nıñ aydutça areketlerine ayrıca diqqat etildi.

Muşavere çerçivesinde Daimiy Temsilci AHİT-nıñ azaları olğan bir sıra devletlerniñ eyetleri ile vaqtınca işğal etilgen Qırımnıñ meselelerini muzakere etti ve Muşavereniñ iştirakçileri tarafından teşkil etilgen ‘‘Uquq qorçalayıcılar tarafından aq-uquqlarnı qorçalavnıñ ve temin etüvniñ devletler, teşkilâtlar ve cemiyet içün eñ güzel nümüneleri’’, ‘‘Ukrainada qıynavlar: islâatlar ile cezasızlıq arasında’’, ‘‘Qırımda jurnalistlerni taqip etüv ve duşmanlıq tili’’, ‘‘İşğal etilgen Qırımnıñ sakinlerini Rusiye tarafından zorbalıqnen quvalav’’ kibi (side event) tedbirlerde çıqışta bulundı.