Bugün Ukraina büyük bir kün – mustaqillik kününi qayd ete. Qırım yarımadası on yıldan ziyade işğal altında bulunmaqta, amma, bütün telükelerge baqmadan, vatandaşlarımız Ukrainanıñ ğalebe qazanacağına ve işğalcilerden qurtarılacağına işanç beslemege devam eteler. Hususan Mustaqillik künü işğal, basqı ve total nezaret şaraitinde Qırım sakinleri Ukrainağa qoltutqanlarını bildireler, işğalcilerge qarşı çıqalar ve bu künde eñ küçük areketlernen baqışlarını bildireler, çünki Qırım – Ukrainadır.
Rusiye Qırımnı işğal etken soñ işğalciler bu künü kütleviy tedbirler, mitingler ya da aktsiyalar keçirmege yasaq ettiler. Lâkin bu bizim vatandaşlarımıznı toqtatmadı.
Böyle etip, 23 ve 24 avgust künleri işğalci “politsiya” adetince Aqmescitteki Şevçenko abidesi yanında insanlarnıñ anda kelip, çeçek qoyğanlarını közete. Meselâ, 2014 senesi Aqmescitniñ merkezindeki Lenin meydanını qoralarnen qapattılar, Şevçenko parkını ise, sözde mina telükesi iddalarınen, işğalci “politsiya” sarıp aldı.
Buña beñzegen tedbirler başqa şeerlerde de olıp keçe. Mustaqillik kününde Saq şeeriniñ sakinleri Lesâ Ukrainanıñ abidesine, Kezlevde ise Şevçenkonıñ abidesine çeçek qoydılar.
Bir qaç kere Ukrainağa qol tutqan faaller tutulıp, rayon idarelerine alıp ketildi, işğalciler abideler yanındaki çeçeklerni yoq ettiler, amma bu insanlar, iç bir şeyge baqmadan, bu künni qayd etmege devam eteler. Aynı zamanda şeerlerde ukrain timsallerinen yaşlarnı körmek mümkün: milliy bayraq renklerindeki urbalar, ellerinde mavı ve sarı şeritler, patriotik manikürler ve ilâhre.
2015 senesi Aqmescitniñ işğalci memuriyeti Taras Şevçenkonıñ abidesine çeçek qoymaq içün miting keçirüv aqqında avgustnıñ 18-de berilgen arizanı red etti, amma ukrain faalleri kene de bir arağa keldi. Ondan soñ işğalciler Ukraina medeniy merkeziniñ temsilcilerini tutıp aldılar. Kıyiv patriarhatı ukrain ortodoks kilisesiniñ muqaddes musaviyleri knâz Vladimir ve knâginâ Olganıñ Aqmescit katedral kilsesinde bayram ibadeti keçirildi.
2017 senesi Ukraina mustaqilligi kününe Qırım sakinleri selâmlavlar azırladılar: Aqyar, Aqmescit, Bağçasaray ve Kefe sakinleri Vasıl Sımonenkonıñ “Şimdi qaydasız, halqımnıñ cellâtları?” şiirinen video çıqardılar.
2022 senesi Aqmescitte Ukraina mustaqilligi künü arfesinde şeerniñ özünde ve onıñ civarlarında bildirmeler peyda olmağa başladı, anda Ukraina ve Qırım bir bütün olğanı açıq-aydın kösterile. Resimler milliy renklernen boyalanğan, olarnıñ üstünde ise: “Mustaqillik künü hayırlı olsun, Ukraina”, degen yazılar yer almaqta edi.
2023 senesi, Mustaqillik kününde, işğal etilgen Qırımda Ukraina mahsus quvetleriniñ arbiy operatsiyası aqqında belli oldı. İstihbarat tarafından berilgen malümatqa köre, ukrain askerleri yarımadağa kelip, bir sıra vazifelerni becerdiler, em de anda Ukraina devlet bayrağını yerleştirdiler.
On yıldan ziyade sürgen işğalge baqmadan, Qırımdaki vatandaşlarımız, şu cümleden ayrı qarşılıq areketleri boysunmamazlıq ve vatanperverlikni köstermege etmege devam eteler. İşğalciler tarafından basqılarğa, yasaqlarğa ve tehditlerge baqmadan, Qırım sakinleri bu künni qayd etmek içün çeşit yollar tapalar, çeçek qoyalar, gizli areketler teşkil eteler, ya da bildirmeler asalar, serbestlikke olğan sarsılmaz isteklerini ve Ukrainanıñ yarımada üzerindeki nezareti tiklenüvine işançlarını taqdim eteler.