22 yanvar künü Ukrainanıñ Birleşme Künü qayd etile. 1918 senesi yanvarniñ 22-nde Ukraina Merkez Şurası Dörtünci Universalınen Ukrainanıñ mustaqilligini ilân etti. 1919 senesi yanvarniñ 22-nde ise Kyivniñ Sofiya medanında Ukraina Halq Cumhuriyeti ve Ğarbiy Ukraina Halq Cumhuriyetiniñ birleşme Aktı ilân etildi. Bu vaqia ukrain halqınıñ asırlar devamında hayal etken mustaqillik, birlik, öz muqadderatını tayin etüv arzusını yerine ketirdi.

Birleşme kününiñ arfesinde, yanvarniñ 21-nde, 1990 senesi olıp keçken “canlı zıncır”nıñ yıldönümi qayd etile. Bu Ukraina tarihında vatandaşlarnıñ eñ büyük birdemlik aktsiyalarından birisi oldı, millionlarca ukrainler biri-biriniñ qolundan tutıp, Lvivden Kıyivge qadar ukrain topraqlarınıñ birligini ve bölünmezligini aks etken insan zıncırını teşkil ettiler. Bu vaqia mustaqillik ve birlik isteginiñ timsali oldı, kelecekte Ukrainanıñ devlet suvereniteti ve mustaqilligi ilân etüv içün müim bir siltem oldı. “İnsan zıncırı” kelecekte mustaqil Ukrainanıñ Çernigovdan Aqyarğace, Ujgorodtan Luğanskqace “sınırlarını” çizdi.

Birleşme timsali olaraq “canlı zıncır” ğayesi Qırımda da yapıldı. Yarımada rusiye tarafından işğal etilmezden evel Aqmescit, Aqyar, Yalta ve diger Qırım şeerlerinde yaşlar ve faal vatandaşlar er sene böyle aktsiyalar keçirip, Qırım Ukrainanıñ ayırılmaz bir parçası olğanını bildire ediler. 2011 senesi yanvarniñ 22-nde Yaltadaki aktsiya ayrıca diqqat çekti, o vaqıt anda biñge yaqın insan şeer yalısında “insan zıncırnı” teşkil ettiler.

Yaltadaki soñki aktsiya 2014 senesi yanvarniñ 22-nde keçti, amma Qırımnıñ başqa şeerlerinde tınç narazılıq aktsiyaları rus işğali başlanğan soñ bile devam etti. Böyle etip, 2014 senesi martnıñ 14-nde Aqmescitniñ kirişinde faaller rus tecavuzına ve Qırımnıñ işğal etilmesine qarşı büyük “canlı zıncır” teşkil ettiler. Aktsiyanıñ iştirakçileri ellerinde ukrain ve qırımtatar bayraqlarınen “Cenkke olmasın”, “Biz barışıq tarafdarımız”, “Qırım – Ukraina” plakatlarını tutıp, yol boyu tizilip, Ukrainanıñ birligini ve işğalge qarşı çıqqanlarını kösterdiler.

İşğalden soñ esas Ukrainağa köçip kelgen Qırım sakinleri Kıyivde ve başqa şeerlerde “canlı zıncırlarında” iştirak etmege devam ettiler. 2021 senesi yanvarniñ 22-ne qadar Kıyiv ve Aqmescit arasında virtual “Birlik zıncırı” teşkil etildi, o Ukrainanıñ ve dünyanıñ çeşit köşelerinden 37 biñden ziyade iştirakçini birleştirdi. Onlayn platformalar sayesinde adamlar Ukraina ve Qırım bayraqları olğan fotoresimlernen birlik ve işğalden qurtuluvğa qoltutuv şiarlarını paylaştı.

Bugün Ukraina vatandaşları em cebede, em de işğal etilgen topraqlarda rus işğaline qarşı tirenmege devam eteler ve serbest, mustaqil Ukrainada yaşama degerligini qorçalamaq içün ğayret köstereler.

Vaqtınca işğal etilgen şeerlerniñ, bizim tuvğan qasabalarımıznıñ soqaqlarına Ukrainanıñ milliy bayrağını alıp kene çıqacağımız künler yaqın olğanına inanamız. Bir kün kene birlikte, bir-birimizniñ elinden tutıp, birligimizniñ, sebatımıznıñ ve serbest, mustaqil, demokratik devlette yaşama arzumıznıñ timsali olğan “canlı zıncırnı” kene şekillendirecekmiz. 

Birleşme Künü hayırlı olsun, Ukraina!